ناندیڑ:10ستمبر۔(ورق تازہ نیوز)ناندیڑ شہر سمیت ضلع کے مختلف تعلقہ جات میںآج دوپہر سے موسلادھار بارش کاسلسلہ شروع ہوگیا ۔گزشتہ کئی دنوں سے گرمی کی شدت میں اضافہ ہوگیاتھا اورسورج کی تپش بھی بڑھ گئی تھی ۔جس کی وجہہ سے سبھی پریشان تھے اور بارش کیلئے دُعا کررہے تھے ۔ آج 10ستمبرکو صبح سے زیادہ ہی گرمی ہورہی تھی پھر دوپہر بعد اچانک آسمان پر بادل چھاگئے اور کچھ ہی دیر میں موسلادھاربارش شروع ہوگئی اور یہ سلسلہ تقریبا ایک گھنٹہ تک جاری رہا ۔جس کے بعد سڑکوںپر حسب معمول جل تھل ہوگیاتھا ۔
دوپہر بعدسے موسم خوشگوار ہوگیااور رات میں پھر ایکبار شدید بارش ہوئی ۔دریں اثناءممبئی کے علاقائی موسمیاتی مرکز نے 11 ستمبر سے 16 ستمبر تک گرج چمک کے ساتھ بارش کے ساتھ مراٹھواڑہ اور ودربھ کے اضلاع میں تیز بارش کی پیش گوئی کی ہے۔ ناندیڑ ڈسٹرکٹ ڈیزاسٹر مینجمنٹ اتھارٹی نے موسم کی پیش گوئی کے پیش نظر انتباہ جاری کیا ہے۔گرج چمک کے ساتھ بارش کی پیش گوئی ہو تو شہری باہر جانے سے گریز کریں۔ اگر کھلی جگہ میں کوئی ہے اور اس کے آس پاس کوئی محفوظ عمارت موجود نہیں ہے تو ، نیچے کی طرف اپنے گھٹنوں پر سر رکھ کر بیٹھ جاناجو محفوظ ہوگا۔ بجلی گرنے کی صورت میں گھر میں بجلی کے آلات فوری طور پر بند کردیئے جائیں۔
تار کی باڑ ، بجلی کے کھمبے اور دیگر آئرن اشیاءسے دور رہنا بہتر ہے۔اگر آسمان میں گرج چمک ہو یا بجلی گری ہو تو موبائل فون استعمال کرنے سے گریز کریں۔ لینڈ لائن فون کے استعمال سے بھی پرہیز کرنا چاہئے۔ ڈسٹرکٹ ڈیزاسٹر مینجمنٹ اتھارٹی کی جانب سے رہائشی ڈپٹی کلکٹر مسز سنتوشی دیوکولے نے شہریوں سے خطرہ کے امکان کے پیش نظر مزید چوکس رہنے کی اپیل کی ہے۔