ناندیڑ:(ورق تازہ نیوز) لوہا پولیس اسٹیشن کی حدود میں گھریلو تنازع کے دوران اپنی بیوی پر دیسی پستول سے فائرنگ کرکے اسے قتل کرنے کی کوشش کرنے والے ملزم کو ناندیڑ کی مقامی کرائم برانچ (LCB) نے گرفتار کر لیا ہے۔پولیس کے مطابق 6 جولائی 2026 کی رات تقریباً 11 بجے شکایت کنندہ ارچنا وشال جادھو (19 سال)، ساکن ٹیچر کالونی، لوہا نے شکایت درج کرائی کہ اس کے شوہر وشال سریش جادھو نے گھریلو جھگڑے کے دوران اسے جان سے مارنے کی نیت سے دیسی پستول سے اس کی پیٹھ اور سر پر فائرنگ کی۔
اس شکایت کی بنیاد پر لوہا پولیس اسٹیشن میں بھارتیہ نیائے سنہتا (BNS) کی دفعات 109، 115(2)، 351(2)، 351(3)، 85 اور آرمز ایکٹ کی دفعات 3/25 کے تحت مقدمہ درج کیا گیا۔واقعہ کی سنگینی کو دیکھتے ہوئے سپرنٹنڈنٹ آف پولیس ڈاکٹر نیلابھ روہن نے مقامی کرائم برانچ کے پولیس انسپکٹر اتل بھوسلے کو ملزم کی فوری گرفتاری کی ہدایت دی۔ اس کے بعد کرائم برانچ کی تین خصوصی ٹیمیں تشکیل دی گئیں۔تفتیش کے دوران پولیس سب انسپکٹر روی واہولے اور ان کی ٹیم کو 10 جولائی 2026 کو خفیہ اطلاع ملی کہ مطلوب ملزم ایئرپورٹ پولیس اسٹیشن کی حدود میں واقع آنند ساگر منگل کاریالیہ کے علاقے میں موجود ہے۔
اطلاع کی بنیاد پر پولیس نے جال بچھا کر وشال سریش جادھو (25 سال)، ساکن ٹیچر کالونی، لوہا کو گرفتار کر لیا۔دورانِ پوچھ گچھ ملزم نے جرم کا اعتراف کر لیا، جس کے بعد واردات میں استعمال ہونے والا دیسی کٹا (پستول) بھی پنچنامہ کی موجودگی میں برآمد کر کے ضبط کر لیا گیا۔ بعد ازاں ملزم کو مزید قانونی کارروائی کے لیے مالِ مقدمہ سمیت لوہا پولیس اسٹیشن کے حوالے کر دیا گیا۔یہ کارروائی سپرنٹنڈنٹ آف پولیس ڈاکٹر نیلابھ روہن، ایڈیشنل سپرنٹنڈنٹ آف پولیس ارچنا پاٹل (بھوکر) اور سورج گرو (ناندیڑ) کی رہنمائی میں مقامی کرائم برانچ کے پولیس انسپکٹر اتل بھوسلے، پولیس سب انسپکٹر روی واہولے اور ان کی ٹیم نے کامیابی کے ساتھ انجام دی۔