ناندیڑ:(ورق تازہ نیوز) فرائض کی انجام دہی کے دوران غیر ذمہ دارانہ اور نامناسب رویہ اختیار کر کے محکمہ پولیس کی ساکھ کو نقصان پہنچانے کے الزام میں ضلع ناندیڑ پولیس کے دو اہلکاروں کو معطل کر دیا گیا ہے۔سرکاری اطلاع کے مطابق **پولیس حوالدار سنیل گوپال راؤ کولبدھے اورڈرائیور پولیس کانسٹیبل محمد اویس محمد معز دونوں کا تقررعمری پولیس اسٹیشن میں ہے۔
بتایا گیا ہے کہ *23 جون 2026* کو امری سے دھرم آباد جانے والی سڑک پر سرکاری موٹر سائیکل پر ڈیوٹی انجام دیتے وقت دونوں اہلکاروں کا رویہ ابتدائی طور پر سنگین، غیر نظم و ضبط کا مظاہرہ کرنے والا اور قابلِ اعتراض پایا گیا۔اس معاملے کو سنجیدگی سے لیتے ہوئے پولیس سپرنٹنڈنٹ، ناندیڑ نے 30 جون 2026 کوممبئی پولیس ایکٹ 1951 اور مہاراشٹر پولیس (سزا و اپیل) قواعد 1956 کی متعلقہ دفعات کے تحت دونوں اہلکاروں کو معطل کرنے کے احکامات جاری کیے۔
ناندیڑ پولیس کی جانب سے واضح کیا گیا ہے کہ ضلع پولیس فورس میں کسی بھی قسم کی بدعنوانی، غیر اخلاقی رویے یا محکمانہ بے ضابطگی کو ہرگز برداشت نہیں کیا جائے گا، اور ایسے معاملات میں سخت انتظامی کارروائی عمل میں لائی جائے گی۔ اس کارروائی کے ذریعے محکمہ نے نظم و ضبط برقرار رکھنے اور عوامی اعتماد کو مضبوط بنانے کا واضح پیغام دیا ہے۔