ممبئی :25اپریل۔ (ورق تازہ نیوز)مہاراشٹر میں گرمی کی شدت میں زبردست اضافہ دیکھنے کو مل رہا ہے اور ریاست بھر میں شدید ہیٹ ویو کی صورتحال پیدا ہو گئی ہے۔ اس پس منظر میں محکمہ موسمیات نے ہائی الرٹ جاری کر دیا ہے۔ اس وقت ریاست کے کئی اضلاع میں درجۂ حرارت 40 ڈگری سیلسیس سے تجاوز کر چکا ہے، جس کے باعث روزمرہ زندگی بری طرح متاثر ہو رہی ہے اور سڑکوں و بازاروں میں سناٹا چھایا ہوا ہے۔
ضلع پربھنی سے ایک بڑی خبر سامنے آئی ہے جہاں ہیٹ اسٹروک کے باعث پہلی موت درج ہوئی ہے۔ ناسک سے اپنے بھائی کے پاس پربھنی آئے 37 سالہ شخص کی ہیٹ اسٹروک کے سبب موت ہو گئی۔ یہ واقعہ پربھنی کے ناندکھیڑ روڈ علاقے میں پیش آیا۔ متوفی کی شناخت شیواجی بَبَن کامبلے (عمر 37 سال) کے طور پر ہوئی ہے۔ اس معاملے میں نانلپیٹھ پولیس اسٹیشن میں حادثاتی موت کا مقدمہ درج کیا گیا ہے۔
اسی طرح اکولا ضلع میں بھی شدید گرمی کی لہر جاری ہے۔ آج اکولا میں درجۂ حرارت 44 ڈگری سیلسیس ریکارڈ کیا گیا، جبکہ ہفتہ کے روز یہاں 45.6 ڈگری سیلسیس تک پہنچ کر ملک میں سب سے زیادہ درجۂ حرارت کا ریکارڈ بنا۔ محکمہ موسمیات کے مطابق آئندہ تین سے چار دن تک یہی صورتحال برقرار رہنے کا امکان ہے۔
شدید گرمی کے باوجود ٹریفک پولیس اپنے فرائض انجام دے رہی ہے، جس پر ان کی ستائش کی جا رہی ہے۔ انتظامیہ نے شہریوں سے اپیل کی ہے کہ وہ دوپہر 12 بجے سے شام 4 بجے تک بلا ضرورت گھروں سے باہر نہ نکلیں۔ باہر نکلتے وقت سر کو ڈھانپنے، چشمہ استعمال کرنے اور پانی ساتھ رکھنے کی ہدایت دی گئی ہے۔ اکولا میں درجۂ حرارت 44 ڈگری تک پہنچنے کے باعث احتیاطی تدابیر کے طور پر کئی مقامات پر اسکولوں میں تعطیلات کا اعلان کیا گیا ہے۔
ودربھ میں گرمی کا قہر
ریاست کے ودربھ علاقے میں گرمی اپنے عروج پر ہے۔ تین شہروں میں درجۂ حرارت 45 ڈگری سیلسیس سے تجاوز کر چکا ہے جبکہ تین دیگر شہروں میں 44 ڈگری ریکارڈ کیا گیا ہے۔ کئی اضلاع میں درجۂ حرارت 42 ڈگری سے اوپر پہنچ چکا ہے، جس سے عوام شدید پریشان ہیں اور سڑکوں پر ویرانی چھائی ہوئی ہے۔ محکمہ موسمیات نے مزید درجۂ حرارت بڑھنے کا انتباہ دیا ہے۔
ناگپور میں درجۂ حرارت 44.2 ڈگری سیلسیس ریکارڈ کیا گیا، جبکہ اکولا، امراوتی اور وردھا میں درجۂ حرارت 45 ڈگری سیلسیس تک پہنچ گیا ہے۔
ودربھ کے اضلاع میں درجۂ حرارت کی صورتحال:
اکولا – 45.6 ڈگری سیلسیس
امراوتی – 45.6 ڈگری سیلسیس
بھندارا – 44.0 ڈگری سیلسیس
بلڈھانا – 42.2 ڈگری سیلسیس
چندرپور – 44.2 ڈگری سیلسیس
گڈچرولی – 43.6 ڈگری سیلسیس
گوندیا – 43.6 ڈگری سیلسیس
ناگپور – 44.2 ڈگری سیلسیس
وردھا – 45.5 ڈگری سیلسیس
واشیم – 43.0 ڈگری سیلسیس
ایوت محل – 43.0 ڈگری سیلسیس
ناندیڑ -42ـڈگری سیلسیس
انتظامیہ نے شہریوں کو احتیاطی تدابیر اختیار کرنے، زیادہ پانی پینے اور غیر ضروری طور پر دھوپ میں نکلنے سے گریز کرنے کی سخت ہدایت دی ہے۔