مہاراشٹر: ادھو ٹھاکرے کی حلف برداری تقریب میں شرکت کے لیے 400 کسانوں کو خصوصی دعوت

by

ادھو ٹھاکرے کی حلف برداری تقریب کے لیے 400 کسانوں کو دی گئی دعوت: ونایک راؤت

شیوسینا رکن پارلیمنٹ ونایک راؤت نے میڈیا سے بات چیت کے دوران کہا کہ جمعرات کو ادھو ٹھاکرے کی حلف برداری تقریب کے لیے مہاراشٹر کے مختلف اضلاع کے تقریباً 400 کسانوں کو مدعو کیا گیا ہے۔ کسانوں کو عزت دینے کے لیے، ان کسانوں کی فیملی کے رکن جنھوں نے خودکشی کی ہے، انھیں بھی مدعو کیا گیا ہے۔


ادھو ٹھاکرے کی حلف برداری تقریب میں شرکت کے لیے سونیا گاندھی مدعو

شیوسینا لیڈر ایکناتھ شندے نے میڈیا سے بات چیت کے دوران کہا کہ پارٹی نے کانگریس صدر سونیا گاندھی کو ادھو ٹھاکرے کی حلف برداری تقریب میں شرکت کے لیے دعوت نامہ بھیجا ہے۔ انھوں نے کہا کہ شیوسینا چاہتی ہے کہ سونیا گاندھی اس تقریب میں شامل ہوں اور ادھو ٹھاکرے کے لیے اپنی نیک خواہشات کا اظہار کریں۔


کابینہ میں شامل کرنے یا نہ کرنے سے متعلق فیصلہ ادھو ٹھاکرے کریں گے: اجیت پوار

حیرت انگیز طور پر بی جے پی کے ساتھ مل کر نائب وزیر اعلیٰ کا حلف لینے والے اجیت پوار اس عہدہ سے استعفیٰ دے کر ایک بار پھر شرد پوار کے قدموں میں ضرور آ گئے ہیں لیکن انھوں نے جو کچھ کیا ہے اس سے پارٹی لیڈران اب بھی ناراض ہیں۔ یہی وجہ ہے کہ اجیت پوار کو ادھو ٹھاکرے کی کابینہ میں شامل کیا جائے گا یا نہیں، اس پر اب بھی تذبذب کی حالت بنی ہوئی ہے۔ اجیت پوار سے جب میڈیا نے اس سلسلے میں سوال کیا تو انھوں نے کہا کہ کابینہ میں شامل کیا جائے یا نہیں، اس بارے میں فیصلہ ادھو ٹھاکرے کریں گے۔

شیوسینا لیڈروں نے ادھو ٹھاکرے کے وزیر اعلیٰ بننے سے پہلے پارلیمنٹ احاطہ میں منایا جشن

شیوسینا لیڈروں میں اس بات کو لے کر خوشی ہے کہ شیوسینا سربراہ ادھو ٹھاکرے کے لیے مہاراشٹر کا وزیر اعلیٰ بننے کا راستہ ہموار ہو گیا ہے۔ اس خوشی میں شیوسینا لیڈروں نے دہلی واقع پارلیمنٹ احاطہ میں لوگوں کا ’منھ میٹھا‘ کرایا۔ شیوسینا لیڈروں نے آپس میں مٹھائی کھلا کر خوشی کا اظہار کیا اور اس بات کا بھروسہ بھی ظاہر کیا کہ ادھو حکومت ریاستی عوام کے حق میں بڑے فیصلے لے گی۔


شرد پوار کے گھر ہو رہی میٹنگ میں شامل ہونے پہنچے کانگریس لیڈر احمد پٹیل

این سی پی سربراہ شرد پوار کے گھر پر انتہائی اہم میٹنگ ہو رہی ہے جس میں شمولیت کے لیے کانگریس کے سینئر لیڈر احمد پٹیل بھی پہنچ چکے ہیں۔ بتایا جا رہا ہے کہ شرد پوار کے گھر ہو رہی اس میٹنگ میں کئی ایشوز پر بات چیت ہوگی اور یہ بھی طے کیا جائے گا کہ کس پارٹی کو کون سی وزارت ملے گی اور ادھو ٹھاکرے کابینہ کی شکل و صورت کیا ہوگی۔


اسمبلی میں اکثریت ثابت ہونے تک ہوٹل میں ہی رہیں گے شیوسینا، کانگریس اور این سی پی کے اراکین اسمبلی

میڈیا ذرائع سے موصول ہو رہی خبروں کے مطابق جب تک شیوسینا، کانگریس اور این سی پی کی مشترکہ حکومت مہاراشٹر میں تشکیل نہیں پا جاتی اور اکثریت اسمبلی میں ثابت نہیں ہو جاتی، اس وقت تک ان تینوں پارٹیوں کے ہی اراکین اسمبلی کو ہوٹل میں رکھا جائے گا۔ بتایا جا رہا ہے کہ شیوسینا، کانگریس اور این سی پی تینوں ہی پارٹیاں کوئی جوکھم مول نہیں لینا چاہتیں اور اپنے اراکین اسمبلی پر سخت نظر رکھے ہوئی ہیں۔

اراکین اسمبلی کو حلف دلا رہے ہیں پروٹیم اسپیکر کالی داس کولمبکر

مہاراشٹر اسمبلی میں پروٹیم اسپیکر کالی داس کولمبکر سبھی اراکین اسمبلی کو رازداری کا حلف دلا رہے ہیں۔ صبح 8 بجے سے ہی یہ سلسلہ جاری ہے اور کل 287 اراکین اسمبلی کو حلف دلایا جانا ہے۔ قابل ذکر ہے کہ ریاست کے گورنر بھگت سنگھ کوشیاری نے منگل کے روز اعلان کیا تھا کہ بدھ کی صبح 8 بجے اسمبلی کا خصوصی اجلاس بلایا جائے گا۔ اس کے بعد آج صبح سے ہی اراکین اسمبلی کو حلف دلایا جا رہا ہے۔ ادھو ٹھاکرے ریاست کے وزیر اعلیٰ کے طور پر جمعرات کی شام حلف لیں گے۔

ٹھاکرے کابینہ کو شکل دینے کے لیے تینوں پارٹیوں کی میٹنگ شرد پوار کے گھر

این سی پی سربراہ شرد پوار کے گھر پر تینوں پارٹیوں (این سی پی، کانگریس، شیوسینا) کی میٹنگ 12 بجے شروع ہو گئی۔ تینوں پارٹیوں کے بڑے لیڈران اس میٹنگ مین شامل ہوئے ہیں۔ کانگریس کی طرف سے ملکارجن کھڑگے، احمد پٹیل اور کے سی وینوگوپال کے شامل ہونے کی خبریں موصول ہو رہی ہیں۔ خبروں کے مطابق میٹنگ میں ادھو ٹھاکرے کی حلف برداری تقریب میں کسے مدعو کیا جائے، اس پر بات چیت ہوگی۔ بتایا جا رہا ہے کہ حلف برداری تقریب میں اپوزیشن کے سبھی بڑے لیڈران اور مختلف ریاستوں کے وزرائے اعلیٰ کو شامل ہونے کی دعوت دی جائے گی۔

میڈیا ذرائع کے مطابق میٹنگ میں ادھو ٹھاکرے کابینہ کی شکل و شباہت کے تعلق سے بھی بات چیت ہوگی اور یہ فیصلہ لیا جائے گا کہ کون سے لیڈر وزارتی عہدہ کے لیے حلف لیں گے۔ اجیت پوار ٹھاکرے کابینہ میں شامل ہوں گے یا نہیں، اس سلسلے میں بھی میٹنگ میں غور و خوض ہو سکتا ہے۔

سی پی ایم کا کہنا ہے کہ وہ مہاراشٹر حکومت کا حصہ نہیں ہوگی

مہاراشٹر میں ادھو ٹھاکرے کے ذریعہ وزیر اعلیٰ عہدہ کا حلف لینے سے پہلے مہاراشٹر سی پی ایم کا ایک بیان سامنے آیا ہے۔ سی پی ایم نے اس بیان میں کہا ہے کہ وہ حکومت کا حصہ نہیں ہوگی، لیکن فلور ٹسٹ کے دوران شیوسینا-کانگریس-این سی پی کی مخالفت بھی نہیں کرے گی۔ واضح رہے کہ مہاراشٹر میں سی پی ایم کا ایک ہی رکن اسمبلی ہے۔

ادھو ٹھاکرے کی حلف برداری تقریب میں شرکت کے لیے شرد پوار خود سونیا کو دیں گے دعوت

ادھو ٹھاکرے کی حلف برداری تقریب میں شرکت کے لیے شرد پوار خود سونیا گاندھی کو دعوت دیں گے۔ حلف برداری 28 نومبر کو ہوگی اور اس سے پہلے احمد پٹیل کے ساتھ کے سی وینوگوپال ممبئی پہنچ گئے ہیں۔ آج دوپہر تقریباً 2 بجے تینوں پارٹیوں (شیوسینا، کانگریس، این سی پی) کی میٹنگ ہوگی۔ خبروں کے مطابق اس میٹنگ میں وزارتوں کی تقسیم کو لے کر بات چیت ہو سکتی ہے۔

شرد پوار کی رہنمائی اور سونیا گاندھی کے تعاون سے بالا صاحب ٹھاکرے کا خواب پورا ہوا: نیلم گورہے

اسمبلی کے خصوصی اجلاس میں شریک ہونے پہنچیں شیوسینا کی سینئر لیڈر نیلم گورہے نے میڈیا سے بات چیت کرتے ہوئے کہا کہ ’’ہمیں کافی خوشی ہے کہ آخر بالا صاحب ٹھاکرے کا خواب پورا ہونے جا رہا ہے۔‘‘ انھوں نے مزید کہا کہ ’’مہا وکاس اگھاڑی کے لیڈر ادھو ٹھاکرے رہیں گے۔ شرد پوار کے بتائے راستے اور سونیا گاندھی کے تعاون کے سبب اب ہم مہاراشٹر کے لیے بہتر کام کر سکیں گے۔‘‘

نائب وزیر اعلیٰ کے لیے کانگریس میں ابھی کوئی نام فائنل نہیں: بالا صاحب تھوراٹ

مہاراشٹر کانگریس کے صدر بالا صاحب تھوراٹ نے میڈیا سے بات چیت کے دوران کہا کہ فی الحال نائب وزیر اعلیٰ کے لیے پارٹی میں کوئی نام فائنل نہیں ہوا ہے۔ واضح رہے کہ شیوسینا کی طرف سے ادھو ٹھاکرے کے بطور وزیر اعلیٰ نام فائنل ہو گیا ہے جب کہ کانگریس اور این سی پی کی طرف سے ایک ایک نائب وزیر اعلیٰ بنائے جانے کی بات ہے اور ان دونوں پارٹیوں نے ابھی کوئی فائنل نام ظاہر نہیں کیا ہے۔


اسمبلی میں اجیت پوار کا سپریا سولے نے کیا استقبال، گلے مل کر کیا مسرت کا اظہار

آج اسمبلی میں جب این سی پی لیڈر اجیت پوار پہنچے تو ان کا استقبال ان کی چچازاد بہن اور این سی پی لیڈر سپریا سولے نے کیا۔ اجیت پوار نے سپریا کو گلے لگایا اور پھر ایک ویڈیو میں سپریا سولے اجیت پوار کا پیر چھوتی ہوئی بھی نظر آئیں۔ قابل ذکر ہے کہ اجیت پوار کے بی جے پی سے ہاتھ ملانے کی خبر کے بعد سپریا سولے کافی مایوس تھیں۔


اسمبلی میں مہاراشٹر کے نومنتخب اراکین اسمبلی کی ہو رہی حلف برداری

مہاراشٹر کے گورنر بھگت سنگھ کوشیاری کے ذریعہ بلائے گئے خصوصی اسمبلی اجلاس میں ریاست کے نومنتخب اراکین اسمبلی کو حلف دلایا جا رہا ہے۔ این سی پی لیڈر اور سابق نائب وزیر اعلیٰ اجیت پوار کے ساتھ ساتھ بی جے پی لیڈر اور سابق وزیر اعلیٰ دیویندر فڑنویس نے حلف لے لیا ہے۔


اسمبلی کا خصوصی اجلاس شروع، آج اراکین اسمبلی کی ہوگی حلف برداری

وزیر اعلیٰ دیویندر فڑنویس کے استعفیٰ کے بعد گورنر بھگت سنگھ کوشیاری نے 27 نومبر کی صبح 8 بجے اسمبلی کا خصوصی اجلاس بلایا۔ سبھی اراکین اسمبلی اس وقت اسمبلی میں موجود ہیں۔ شیوسینا سربراہ ادھو ٹھاکرے اور ان کے بیٹے آدتیہ ٹھاکرے نے اسمبلی پہنچنے سے پہلے سدھی ونایک مندر میں پوجا کی۔ این سی پی لیڈر اجیت پوار اور سپریا سولے بھی اسمبلی پہنچ چکے ہیں۔ سپریا نے میڈیا سے بات کرتے ہوئے کہا کہ ہم پر ایک بہت بڑی ذمہ داری آ گئی ہے اور مہاراشٹر کی عوام امید بھری نظروں سے ہماری طرف دیکھ رہی ہے۔ عوام کے حق میں اقدام کیے جائیں گے۔

یہ ایک سینڈیکیٹیڈ فیڈ ہے ادارہ نے اس میں کوئی ترمیم نہیں کی ہے. – Source بشکریہ قومی آواز بیورو—-

اپنی رائے یہاں لکھیں