ضلع پریشد نے ’ہر گھر ترنگا – ہر گھر سوچھتا‘ مہم کا آغاز کیا
11 اگست، تھانے –(آفتاب شیخ)
یومِ آزادی کے موقع پر
ضلع پریشد تھانے نے "ہر گھر ترنگا – ہر گھر سوچھتا" کے عنوان سے ایک خصوصی مہم کا آغاز کیا ہے، جو 15 اگست تک جاری رہے گی۔ یہ مہم وزارتِ ثقافت، پینے کے پانی اور صفائی ستھرائی کے محکمے اور ریاستی پانی و صفائی مشن کے اشتراک سے ٹیگ لائن ’آزادی میلہ، صفائی‘ کے تحت منائی جا رہی ہے۔
ضلع پریشد کے چیف ایگزیکٹیو آفیسر روہن گھوگے اور پروجیکٹ ڈائریکٹر پنڈت راٹھوڑ نے عوام سے اپیل کی کہ وہ اس مہم میں بھرپور حصہ لیں۔ اس دوران عوامی مقامات، پانی کے ٹینکوں، پمپ ہاؤسز اور صفائی کی دیگر سہولیات کی تزئین و آرائش کی جائے گی، جبکہ طلباء و نوجوان دیہات میں صفائی ریلیاں نکال کر ہر گھر میں رنگولیاں اور سجاوٹ کے ذریعے صفائی کا پیغام عام کریں گے۔
مہم کے اہم مقاصد میں عوامی شراکت سے قومی فخر اور صفائی کے احساس کو فروغ دینا، پائیدار پانی کی فراہمی اور صحت و صفائی سے متعلق سرگرمیوں کا نفاذ، اور شہریوں و طلباء سے ’سوچھ سوجل گاؤں‘ کا عہد لینا شامل ہے۔
مہم کے دوران 12 اگست کو جل جیون مشن کے تحت پانی کے ٹینکوں، نلکوں اور پمپ ہاؤسز کی صفائی اور خوبصورتی، 13 اگست کو کچرے کے انتظام، بیت الخلا کی دیکھ بھال، پانی کے تحفظ اور پلاسٹک کے استعمال سے اجتناب کے بارے میں بیداری پیدا کی جائے گی۔ 14 اگست کو گاؤں کے عوامی مقامات کی حتمی صفائی اور سجاوٹ کی جائے گی، جبکہ 15 اگست کو صفائی کے چیمپئنز اور رضاکاروں کو اعزازات دیے جائیں گے۔
اس عرصے میں نالوں کی صفائی، سیوریج مینجمنٹ، پانی کے اخراج کی روک تھام، عوامی بیت الخلاء کی دیکھ بھال، اور سالڈ ویسٹ و پلاسٹک مینجمنٹ مراکز کو فعال کرنے جیسی سرگرمیاں بھی انجام دی جائیں گی۔