شہریت ترمیمی بل پر آسام اور تریپورہ میں ہنگامہ جاری، ٹرین اور پروازیں رد، کئی کھیل منسوخ

شہریت ترمیمی بل کے خلاف شمال مشرق کی ریاستوں میں ہنگامہ جاری ہے۔ تشدد، آگ زنی اور احتجاجی مظاہروں کا سب سے زیادہ اثر آسام میں دکھائی دے رہا ہے۔ صرف آسام ہی نہیں بلکہ اروناچل پردیش، میگھالیہ سمیت دیگر ریاستوں میں بھی احتجاجی مظاہرے تیز ہوتے جا رہے ہیں۔ آسام کے وزیر اعلیٰ سروانند سونوال، بی جے پی رکن اسمبلی پرشانت پھوکان کے گھر یا قافلے پر مظاہرین نے حملہ کیا ہے۔ حملے کے دوران مظاہرین نے شہریت ترمیمی بل کے خلاف نعرے بازی بھی کی۔ اس کے علاوہ مظاہرین نے ڈبرو گڑھ میں آر ایس ایس دفتر پر بھی حملہ کیا اور وہاں آگ لگا دی۔

آسام کے چھابوا، پانیتولہ ریلوے اسٹیشن پر مظاہرین نے آگ زنی کی۔ اس دوران وہاں کھڑی گاڑیوں کو بھی نشانہ بنایا گیا اور توڑ پھوڑ کی گئی۔ آسام میں ریاست کی 20 بسوں کو بھی نقصان پہنچایا گیا۔ تنسکیا میں چار دکانوں کو نذر آتش کیے جانے کی خبریں موصول ہو رہی ہیں جب کہ جمعرات کی صبح یہاں پر ایک لاش برآمد کیے جانے کی وجہ سے بھی ماحول بے قابو ہوتا ہوا دکھائی دے رہا ہے۔

مرکزی وزیر اور ڈبروگڑھ سے بی جے پی رکن پارلیمنٹ رامیشور تیلی نے کہا کہ ’’کل (بدھ) رات تقریباً 11 بجے میرے چچا کی دکان میں آگ لگا دی گئی اور میرے گھر کے باؤنڈری وال کو بھی مظاہرین نے نقصان پہنچایا۔ میں آسام کے لوگوں سے امن برقرار رکھنے کی اپیل کرتا ہوں۔‘‘

بگڑتے نظام قانون کو سنبھالنے کے لیے بدھ کو گواہاٹی میں لگائے گئے کرفیو کو غیر معینہ مدت کے لیے بڑھا دیا گیا ہے۔ دوسری طرف جموں و کشمیر میں تعینات سی آر پی ایف کی 10 کمپنیوں کو آسام بھیجا جا رہا ہے۔ ان میں سے پانچ کمپنیاں پہنچ چکی ہیں۔ ان کے علاوہ منی پور کے لیے روانہ کی گئی 7 دیگر کمپنیوں کو آسام جانے کی ہدایت جاری کی گئی ہے۔ وہیں، آسام رائفل کی تین کمپنیوں کو تریپورہ میں تعینات کیا گیا ہے۔

شہریت ترمیمی بل کے خلاف مظاہروں کے درمیان احتیاطی تدبیر اٹھاتے ہوئے کئی پروازوں کو رد کر دیا گیا ہے۔ خبروں کے مطابق گواہاٹی، ڈبرو گڑھ جانے والی پروازوں کو رد کر دیا ہے۔ انڈیگو نے گواہاٹی، ڈبرو گڑھ، جور ہاٹ کی فلائٹ رد کر دی ہے۔ ڈبرو گڑھ ائیر پورٹ پر سبھی 5 جانے والی اور 7 آنے والی پروازیں ردہوئی ہیں۔ انڈیگو کے علاوہ اسپائس جیٹ، وستارا کی پروازیں بھی رد ہوئی ہیں۔ وہیں نارتھ فرنٹیر کے چیف پی آر او نے بتایا کہ ریلوے گواہاٹی سے اوپری آسام علاقے کی جانب جانے والی سبھی ٹرینیں رد کر دی گئی ہیں۔ علاوہ ازیں، آسام، تریپورہ جانے والی سبھی پسنجرٹرینوں کو رد کر دیا گیا ہے۔ ابھی دہلی اور کولکاتا سے جانے والی ٹرین گواہاٹی تک ہی جا رہی ہیں، اس کے آگے کی سہولت بند کر دی گئی ہے۔

اس درمیان آسام میں بے قابو حالات کو دیکھتے ہوئے فٹ بال اسپورٹس ڈیولپمنٹ نے نارتھ ایسٹ یونائٹیڈ ایف سی بمقابلہ چنئین ایف سی انڈین سپر لیگ میچ کو منسوخ کرنے کی خبر دی ہے۔ آسام اور تریپورہ کے درمیان کھیلے جانے والے رانچی ٹرافی میچ کو بھی معطل کیے جانے کی خبریں موصول ہو رہی ہیں۔

یہ ایک سینڈیکیٹیڈ فیڈ ہے ادارہ نے اس میں کوئی ترمیم نہیں کی ہے. – Source بشکریہ قومی آواز بیورو—-