نئی دہلی۔ ملک کی الگ الگ ریاستوں میں پھنسے لوگوں کو ان کے گھر تک پہنچانے کے لئے ریل خدمات بحال کر دی گئی ہیں۔ اب خبر ہے کہ ریلوے کی طرح لوگوں کو گھر پہنچانے کے لئے ائیر انڈیا انیس مئی سے دو جون کے درمیان خصوصی گھریلو پروازیں شروع کرنے جا رہی ہے۔ ان میں سے زیادہ تر پروازیں دہلی، ممبئی، حیدرآباد اور بنگلورو سے ہوں گی۔
ٹائمس آف انڈیا کی خبر کے مطابق، چنئی کے لئے صرف ایک پرواز کی سہولت دی گئی ہے۔ یہ انیس مئی کو کوچی سے چنئی کے لئے اڑان بھرے گی۔ اس کے علاوہ دہلی کے لئے 173، ممبئی کے لئے 40، حیدرآباد کے لئے 25 اور کوچی کے لئے 12 فلائٹ کی شروعات کی جائے گی۔ دہلی سے جو فلائٹس اڑان بھریں گی وہ امرتسر، بنگلورو، گیا، حیدرآباد، جئے پور، احمد آباد، کوچی، وجئے واڑہ، لکھنئو اور کچھ دوسرے شہروں میں جائیں گی۔ اسی طرح ممبئی سے اڑان بھرنے والی ائیر انڈیا کی فلائٹس احمدآباد، حیدرآباد، کوچی، بنگلورو، وشاکھاپٹنم اور وجئے واڑہ کے لئے جائیں گی۔ اس کے علاوہ حیدرآباد سے ممبئی اور دہلی کے لئے بھی فلائٹس اڑائی جائیں گی۔ بنگلورو سے بھی ممبئی، دہلی اور حیدرآباد کے لئے فلائٹس ہوں گی۔ اس کے ساتھ ہی بھبنیشور سے ایک فلائٹ بنگلورو جائے گی۔