نئی دہلی:بھارتی ریلوے نے مسافروں کے لیے ایک بڑا فیصلہ کیا ہے۔ اب ریلوے اسٹیشنوں پر ملنے والا ’ریل نیر‘ کا پانی سستا دستیاب ہوگا۔ ایک لیٹر والی بوتل جو پہلے 15 روپے میں ملتی تھی، اب صرف 14 روپے میں ملے گی۔ اس طرح مسافروں کو فی بوتل ایک روپے کی بچت ہوگی۔
یہ فیصلہ ریلوے کے کمرشل ڈپارٹمنٹ نے کیا ہے۔ تاہم یہ نئی قیمت صرف ’ریل نیر‘ پر ہی لاگو ہوگی، دیگر کمپنیوں کی پانی کی بوتلوں کی قیمت میں کوئی تبدیلی نہیں کی گئی ہے۔
نئی قیمتیں کچھ اس طرح ہیں:
ایک لیٹر والی بوتل: اب 14 روپے (پہلے 15 روپے)
آدھا لیٹر والی بوتل: اب 9 روپے (پہلے 10 روپے)
یہ نئی قیمتیں 22 ستمبر سے نافذ ہوں گی۔ ریلوے کا کہنا ہے کہ اس فیصلے سے مسافروں کو صاف اور محفوظ پانی کم قیمت پر ملے گا، خاص طور پر اُن لوگوں کو فائدہ ہوگا جو سفر کے دوران اکثر پانی خریدتے ہیں۔ مقصد یہ ہے کہ مسافروں کو معیاری اور صاف پینے کا پانی کم قیمت پر فراہم کیا جا سکے۔
قابلِ ذکر ہے کہ ’ریل نیر‘ بھارتی ریلوے کا برانڈ ہے، جو اسٹیشنوں اور ٹرینوں میں مسافروں کو پینے کے لیے صاف و محفوظ پانی مہیا کرتا ہے۔ اسے بھارتی ریلوے کی ذیلی کمپنی آئی آر سی ٹی سی (IRCTC) چلاتی ہے۔ ’ریل نیر‘ کی شروعات 2003 میں ہوئی تھی، اُس وقت اسٹیشنوں پر ناقص معیار کا پانی عام فروخت ہوتا تھا۔ اس اسکیم کا مقصد مسافروں کو اعلیٰ معیار کا اور قابلِ بھروسہ پیکجڈ پانی مہیا کرنا ہے۔