ممبئی: (ورق تازہ نیوز)معروف صنعت کار انِل امبانی کے ممبئی میں واقع رہائشی مکان ‘Abode’ پر انفورسمنٹ ڈائریکٹوریٹ (ای ڈی) نے عارضی ضبطی کی کارروائی انجام دی ہے۔ ای ڈی کے ذرائع کے مطابق ضبط کی گئی اس جائیداد کی مالیت تقریباً 3,716 کروڑ روپے بتائی جا رہی ہے۔
ای ڈی کی فراہم کردہ معلومات کے مطابق انِل امبانی اور ان کے صنعتی گروپ کی کمپنیوں کے خلاف اب تک مجموعی طور پر 15 ہزار کروڑ روپے سے زائد مالیت کی جائیدادیں ضبط کی جا چکی ہیں۔
ادھر ای ڈی کی کارروائی سے قبل پیر کے روز ممبئی ہائی کورٹ نے بھی انِل امبانی کو بڑا جھٹکا دیا۔ ہائی کورٹ نے اس معاملے سے متعلق سنگل جج بینچ کے عبوری حکم کو منسوخ کر دیا ہے۔ سنگل جج بینچ نے رِلائنس کمیونیکیشنز لمیٹڈ (آرکام) کے بینک کھاتوں کو دھوکہ دہی کے زمرے میں شامل کرنے کی کارروائی پر روک لگا دی تھی، جسے اب ختم کر دیا گیا ہے۔
ذرائع کے مطابق ای ڈی کی یہ کارروائی منی لانڈرنگ مخالف قانون کے تحت کی گئی ہے۔ خبر رساں ایجنسی پی ٹی آئی کے مطابق اس معاملے میں عارضی ضبطی کے احکامات جاری کیے گئے ہیں۔ بتایا جاتا ہے کہ یہ کیس انِل امبانی کی کمپنی رِلائنس کمیونیکیشنز (آرکام) سے متعلق مبینہ بینک فراڈ کے معاملے سے جڑا ہوا ہے۔
جس رہائش گاہ پر ای ڈی نے کارروائی کی ہے وہ ممبئی کے پوش علاقے پالی ہل میں واقع ایک عالی شان عمارت ہے۔ ‘Abode’ نامی یہ عمارت کل 17 منزلہ ہے۔ اگرچہ یہ ضبطی عارضی نوعیت کی ہے، تاہم اس کارروائی کے بعد انِل امبانی کی مشکلات میں مزید اضافہ ہونے کا امکان ظاہر کیا جا رہا ہے۔