اہم خبر: چندرا بابو نائیڈو کو پولس نے ’چلو اتماکورو‘ ریلی میں جانے سے روکا، گھر میں کیا قید

آندھرا پردیش: ’چلو اتماکورو‘ ریلی میں نہیں جا سکے چندرا بابو نائیڈ، پولس نے گھر میں کیا قید

آندھرا پردیش کے سابق وزیر اعلیٰ چندرا بابو نائیڈو کو پولس نے ان کے گھر میں ہی نظر بند کر دیا ہے۔ اس کے بعد بھی وہ پچھلے دروازے سے نکل کر ’چلو اتماکورو‘ ریلی میں شامل ہونے کے لیے نکل رہے تھے۔ لیکن پولس نے انھیں جانے نہیں دیا اور گھر میں قید کر دیا ہے۔ ان کے گھر کے صدر دروازے پر پولس نے پہلے ہی تالا لگا دیا ہے اور انھیں نکلنے سے منع کر دیا ہے۔

جھارکھنڈ: سبزی چوری کے شبہ میں دو بہنوں کی زبردست پٹائی

جھارکھنڈ کی راجدھانی رانچی میں کچھ لوگوں کے ذریعہ سوبا گاؤں کی دو سگی بہنوں کے ساتھ بربریت کا معاملہ سامنے آیا ہے۔ دونوں کو سبزی چور بتا کر درخت سے باندھ کر ان کی زبردست پٹائی کی گئی ہے۔ اس پٹائی کے بعد بھی جب لوگوں کا دل نہیں بھرا تو دونوں خواتین کے بالٹ کاٹ دیے۔ معاملہ بڑھمو کے ٹھاکر گاؤں تھانہ حلقہ کا ہے۔ دونوں بہنوں کی شناخت سالو دیوی اور بالو دیوی کی شکل میں ہوئی ہے جو بڑھمو ڈویژن کے بترو گاؤں کی رہنے والی ہیں۔ دونوں بہنیں سبزی کا کاروبار کرتی ہیں۔ فی الحال دونوں کو سنگین حالت میں ریمس اسپتال میں داخل کرایا گیا ہے۔

اتر پردیش: بدایوں میں لوٹ کی مزاحمت کرنے پر 60 سالہ شخص کا گولی مار کر قتل

بدایوں: اترپردیش میں بدایوں کے اوجھانی علاقے میں بدھ کی صبح بدمعاشوں نے لوٹ مار کے خلاف مزاحمت کرنے پر ایک شخص کو گولی مار کر قتل کر دیا اور تقریباً ساڑھے سات ہزار روپے لوٹ کر فرار ہو گئے۔ یہ اطلاع پولیس ذرائع نے آج یہاں دی۔ ذرائع نے بتایا کہ جمرولی رہائشی كنورپال اور کرپال کسی کام سے رائے بریلی گئے تھے۔ وہ لوگ بس سے علی الصبح چار بجے رائے بریلی سے اوجھانی اترے تھے۔ دونوں کو لینے کے لئے كنورپال کے والد آنندپال موٹر سائیکل سے اوجھانی پہنچے۔ انہوں نے بتایا کہ جب تینوں موٹر سائیکل پر جمرولی جانے لگے اسی وقت چار بدمعاش آئے اور ان لو گوں سے طمنچے کی نوک پر لوٹ مار کرنے لگے۔ مزاحمت کرنے پر بدمعاشوں نے 60 سالہ آنندپال کو گولی مار دی اور تقریباً ساڑھے سات ہزار روپے لوٹ کر فرار ہو گئے۔ ذرائع نے بتایا کہ سنگین حالت میں آنندپال کو اسپتال لے جایا گیا، جہاں اس کی موت ہو گئی۔ پولس بدمعاشوں کی سرگرمی سے تلاش کر رہی ہے۔

ٹی ڈی پی سربراہ چندرا بابو نائیڈو اور ان کے بیٹے کو نظر بند کیا گیا

تیلگو دیشم پارٹی کے سربراہ چندرا بابو نائیڈو اور ان کے بیٹے نارا لوکیش کو نظر بند کیے جانے کی خبریں موصول ہو رہی ہیں۔ میڈیا ذرائع کے مطابق چندرا بابو نائیڈو برسراقتدار وائی ایس آر کانگریس کی مبینہ شہ پر ہو رہے حملوں کے خلاف آج احتجاجی مارچ نکالنے والے تھے، لیکن اس سے پہلے ہی ریاستی حکومت نے انھیں نظر بند کر دیا۔ ساتھ ہی ریاستی انتظامیہ نے ریاست میں نرسراوپیٹا، ستنپلے، پالناڈو اور گرجلا علاقے میں دفعہ 144 بھی نافذ کر دیا ہے۔

یہ ایک سینڈیکیٹیڈ فیڈ ہے ادارہ نے اس میں کوئی ترمیم نہیں کی ہے. – Source بشکریہ قومی آواز بیورو—-