اہم خبر : سونیا گاندھی کانگریس پارلیمانی پارٹی کی لیڈر منتخب

سونیا گاندھی کانگریس پارلیمانی پارٹی کی لیڈر منتخب، 12 کروڑ ووٹروں کا ادا کیا شکریہ

کانگریس پارلیمانی پارٹی کی آج ہونے والی میٹنگ میں سونیا گاندھی کو ایک بار پھر لیڈر منتخب کیا گیا ہے۔ اس دوران پارٹی کے سبھی 52 لوک سبھا اراکین پارلیمنٹ موجود تھے۔ سونیا گاندھی نے اس موقع پر ان 12.13 کروڑ ووٹروں کا شکریہ ادا کیا جنھوں نے کانگریس میں اپنا اعتماد ظاہر کیا۔ پارلیمانی پارٹی کی میٹنگ میں کانگریس صدر راہل گاندھی، سابق وزیر اعظم منموہن سنگھ، آنند شرما، غلام نبی آزاد سمیت کئی لیڈر موجود تھے۔

اویسی کا پی ایم مودی پر حملہ، 300 سیٹ جیتنے سے منمانی کا حق نہیں مل جاتا

آل انڈیا مجلس اتحادالمسلمین کے سربراہ اسدالدین اویسی نے پی ایم مودی کو تنقید کا نشانہ بنایا ہے۔ انھوں نے کہا کہ اگر کوئی یہ سمجھ رہا ہے کہ ہندوستان کے وزیر اعظم 300 سیٹ جیت کر ہندوستان پر منمانی کریں گے، تو ایسا نہیں ہو سکتا۔ وزیر اعظم سے ہم کہنا چاہتے ہیں کہ آئین کا حوالہ دے کر اویسی آپ سے مجبوروں اور محروموں کے انصاف کے لیے لڑے گا۔

ہندوستانی فضائیہ نے ہٹائی بالاکوٹ ائیر اسٹرائک کے بعد ہوائی روٹ پر لگائی گئی پابندی

بالاکوٹ ائیر اسٹرائیک کے بعد ہندوستان کے ہوائی علاقے میں ہوائی روٹوں پر لگائی گئی سبھی غیر مستقل پابندیوں کو ہٹا لیا ہے۔ ہندوستانی فضائیہ کی جانب سے جمعہ کی شام یہ جانکاری دی گئی۔ وہیں پاکستان نے بدھ کو کمرشیل پروازوں کے لیے اپنے ہوائی علاقوں میں ہندوستان پر لگائی گئی پابندی کو 14 جون تک بڑھا دیا ہے۔

ورجینیا میں فائرنگ، 12 افراد ہلاک، 6 زخمی

ورجینیا بیچ کے پاس فائرنگ کی خبریں موصول ہو رہی ہیں جس میں کم از کم بارہ افراد کے ہلاک ہونے کی اطلاع ہے۔ اس فائرنگ میں چھ لوگ زخمی بھی ہوئے جنھیں علاج کے لیے اسپتال میں داخل کرایا گیا ہے۔ ایک پولس اہلکار کے مطابق فائرنگ کا یہ واقعہ ورجینیا بیچ کی ایک عمارت میں ہوا۔