اہم خبر: جھارکھنڈ میں تشدد کے دوران ایک بجے تک 45 فیصد سے زیادہ پولنگ

by

جھارکھنڈ میں تشدد کے دوران ایک بجے تک 45 فیصد سے زیادہ پولنگ

رانچی: جھارکھنڈ اسمبلی انتخابات کے دوسرے مرحلے کے دوران ضلع گملا کے سیسئی کے ایک پولنگ اسٹیشن پر پولس کی فائرنگ سے ایک دیہاتی ہلاک ہو گیا، جبکہ پولس اہل کار سمیت کم از کم چھ افراد زخمی ہوگئے۔

دریں اثنا ، دوسرے علاقوں میں پولنگ پر امن طریقے سے جاری ہے۔ دوپہر ایک بجے تک 45 فیصد سے زیادہ پولنگ ریکارڈ کی جا چکی ہے۔ پولس کے مطابق ضلع گملا کے سیسئی اسمبلی حلقہ کے پولنگ اسٹیشن نمبر 36 پر پولس نے گڑبڑی کی کوشش کے دوران فائرنگ کی۔ اس فائرنگ کے تبادلے میں ایک دیہاتی کی موت ہوگئی ہے۔ واقعے کے بعد اس پولنگ اسٹیشن پر ووٹنگ روک دی گئی۔

کرناٹک: 7 سالہ بچی سے عصمت دری کرنے والے شخص کو 10 سال سزائے قید

کرناٹک کے شموگا میں 7 سالہ بچی سے عصمت دری کے معاملے میں 32 سالہ شخص کو عدالت نے قصورار قرار دیا ہے۔ عدالت نے مجرم کو 10 سال قید کی سزا سنائی ہے۔ اس کے ساتھ ہی عدالت نے 30 ہزار روپے کا جرمانہ بھی لگایا ہے۔ اپنا فیصلہ سناتے ہوئے عدالت نے ریاستی حکومت کو یہ حکم دیا ہے کہ متاثرہ کو 3 لاکھ روپے کا معاوضہ دے۔ واضح رہے کہ عصمت دری کا یہ معاملہ سال 2014 کا ہے۔


روزانہ کسی نہ کسی خاتون کے ساتھ عصمت دری، چھیڑ چھاڑ، پٹائی کے بارے میں پڑھتے ہیں: راہل گاندھی

کیرالہ کے سلطان باتھری میں ایک جلسہ عام سے خطاب کرتے ہوئے کانگریس رکن پارلیمنٹ راہل گاندھی نے کہا کہ ’’آپ دیکھ رہے ہیں کہ پورے ملک میں تشدد بڑھ رہا ہے، خواتین کے خلاف مظالم کے واقعات بڑھ رہے ہیں۔ روزانہ ہم کسی نہ کسی خاتون کے ساتھ عصمت دری، چھیڑ چھاڑ، پٹائی کے بارے میں پڑھتے ہیں۔‘‘ انھوں نے مزید کہا کہ ’’اقلیتی طبقات کے خلاف تشدد ہو رہا ہے، ان کے خلاف نفرت پھیلائی جا رہی ہے۔ دلتوں کے خلاف بھی تشدد ہو رہا ہے، انھیں مارا پیٹا جا رہا ہے۔ قبائلیوں پر مظالم کی انتہا ہو رہی ہے، ان کی زمین چھینی جا رہی ہے۔‘‘


صفدر جنگ اسپتال سے مقتولہ عصمت دری متاثرہ کی لاش اناؤ کے لیے روانہ

95 فیصد جل چکی اناؤ عصمت دری متاثرہ کی موت گزشتہ شب ہوئی تھی اور اب صفدر جنگ اسپتال میں لاش کا پوسٹ مارٹم بھی مکمل ہو چکا ہے۔ اسپتال سے اب مقتولہ کی لاش اناؤ واقع اس کے آبائی گاؤں لے جایا جا رہا ہے۔


جھارکھنڈ الیکشن: سیکورٹی فورسز سے اسلحہ چھیننے کی کوشش، فائرنگ میں ایک شخص زخمی

جھارکھنڈ میں دوسرے مرحلہ کی ووٹنگ کے درمیان سسئی اسمبلی حلقہ میں فائرنگ کی خبر ہے۔ بتایا جا رہا ہے کہ کچھ لوگوں نے ریپڈ ایکشن فورس کے جوانوں سے ان کا اسلحہ چھیننے کی کوشش کی۔ اس دوران سیکورٹی فورسز نے بچاؤ میں فائرنگ کی ہے۔ اس دوران ایک شخص کو گولی لگنے کی خبر ہے۔

اناؤ عصمت دری متاثرہ کی موت سے غمزدہ اکھلیش یادو اسمبلی کے باہر دھرنے پر بیٹھے

اتر پردیش میں خواتین کے خلاف ظلم میں لگاتار ہو رہا ہے اور سابق وزیر اعلیٰ اکھلیش یادو اس کے لیے ریاست کی یوگی حکومت کو ذمہ دار ٹھہراتے رہے ہیں۔ آج جب انھوں نے اناؤ عصمت دری متاثرہ کی موت کی خبر سنی تو وہ کافی غمزدہ ہوئے اور احتجاجاً ریاستی اسمبلی کے باہر دھرنے پر بیٹھ گئے۔ انھوں نے کہا کہ اناؤ کی بیٹی کے ساتھ جو کچھ ہوا وہ افسوسناک ہے اور قصورواروں کے خلاف سختی سے پیش نہ آنا ناقابل قبول ہے۔


حیدر آباد انکاؤنٹر: سپریم کورٹ میں عرضی داخل، پولس اہلکاروں کے خلاف جانچ کا مطالبہ

ایک طرف حیدر آباد انکاؤنٹر میں عصمت دری اور قتل واقعہ کے ملزمین کو ہلاک کیے جانے پر عوام جشن منا رہی ہے، وہیں دوسری طرف ایڈووکیٹ جی ایس منی اور پردیپ کمار یادو نے سپریم کورٹ میں اس پورے واقعہ کی جانچ کا مطالبہ کرتے ہوئے ایک عرضی داخل کی ہے۔ انھوں نے عرضی میں کہا ہے کہ اس معاملہ میں ایف آئی آر درج کی جانی چاہیے اور جانچ کے ساتھ ساتھ ان پولس اہلکاروں کے خلاف کارروائی ہونی چاہیے جو چاروں ملزمین کے انکاؤنٹر میں شریک تھے۔


زندگی کی جنگ ہار چکی اناؤ عصمت دری متاثرہ کا پوسٹ مارٹم جاری

جمعہ کی دیر رات زندگی کی جنگ ہار چکی اناؤ عصمت دری متاثرہ کا اس وقت پوسٹ مارٹم جاری ہے۔ صفدر جنگ اسپتال کے میڈیکل سپرنٹنڈنٹ ڈاکٹر سنیل گپتا نے این اے آئی سے بات چیت کے دوران کہا کہ ڈاکٹر ایم کے واہی کی قیادت میں 10 بجے مقتولہ کا پوسٹ مارٹم ہوگا۔ ڈاکٹر واہی فورنسک یونٹ ڈپارٹمنٹ کے سربراہ ہیں۔


شاہ سلمان نے امریکہ کے ساتھ تعاون کی ہدایت دی

سعودی عرب کے شاہ سلمان بن عبدلعزیز السعود نے ملک کی سیکورٹی ایجنسیوں کو امریکہ کے فلوریڈا میں بحریہ کے اڈے پر فائرنگ کے واقعہ کی تحقیقات میں امریکی تفتیشی ایجنسیوں کے ساتھ تعاون کرنے کی ہدایت دی ہے۔ واشنگٹن میں واقع سعودی عرب کے سفارت خانے نے جمعہ کے روز ایک بیان جاری کر کے کہا ’’شاہ سلمان نے ملک کی سکیورٹی ایجنسیوں کو امریکہ کی متعلقہ ایجنسیوں کو معلومات فراہم کرنے کی ہدایت دی ہے، جس سے اس خوفناک حملے کی تحقیقات میں مدد مل سکے‘‘۔ واضح رہے کہ سعودی عرب کے ایک ’ٹرینی پائلٹ‘ نے فلوریڈا میں واقع بحریہ کے اڈے پر خود کو گولی مارنے سے پہلے تین افراد کا فائرنگ کر قتل کر دیا تھا ۔ اس واقعہ میں کم از کم سات دیگر افراد زخمی ہوئے تھے ۔شاہ سلمان نے امریکہ کے صدر ڈونلڈ ٹرمپ سے بات کرتے ہوئے اس واقعہ پر افسوس کا اظہار کیا تھا اور تحقیقات میں مکمل تعاون کرنے کی یقین دہانی کرائی تھی۔

اناؤ عصمت دری متاثرہ صفدر جنگ میں ہار گئی زندگی کی جنگ

اناؤ عصمت دری متاثری جمعہ کی دیر شب دہلی کے صفدر جنگ اسپتال میں زندگی کی جنگ ہار گئی۔ ڈاکٹروں نے بتایا کہ متاثرہ 95 فیصد جل چکی تھی، اسے بچانے کی کوشش کی گئی لیکن دیر رات اسے دل کا دورہ پڑا جس کے بعد اس کی موت ہو گئی۔ متاثرہ کو جمعرات کی شب ائیر لفٹ کرا کر لکھنؤ سے دہلی لایا گیا تھا۔ اس کا علاج کرنے والے صفدر جنگ اسپتال کے برن اینڈ پلاسٹک سرجری ڈپارٹمنٹ کے ہیڈ ڈاکٹر شلبھ کمار نے بتایا کہ وہ 95 فیصد تک جلی حالت میں آئی تھی۔ انھوں نے بتایا کہ جمعہ شام سے ہی اس کی حالت خراب ہونی شروع ہو گئی تھی، لیکن ہماری کوششوں کے باوجود متاثرہ کو بچایا نہیں جا سکا۔ رات تقریباً 11.10 بجے اسے دل کا دورہ پڑا اور تقریباً 11.40 بجے اس نے دم توڑ دیا۔

متاثرہ کی موت کی خبر ملنے کے بعد مہیلا کانگریس کا رد عمل سامنے آیا ہے۔ اس نے اپنے ٹوئٹر ہینڈل پر لکھا ہے کہ ’’اتر پردیش حکومت سو گئی، ہندوستان کی ایک اور بیٹی نے دم توڑ دیا۔‘‘


یہ ایک سینڈیکیٹیڈ فیڈ ہے ادارہ نے اس میں کوئی ترمیم نہیں کی ہے. – Source بشکریہ قومی آواز بیورو—-

اپنی رائے یہاں لکھیں

Discover more from ورق تازہ

Subscribe now to keep reading and get access to the full archive.

Continue reading