اہم خبر: اسدالدین اویسی دوسرے ذاکر نائک بن رہے ہیں… بی جے پی رکن پارلیمنٹ

by

اسدالدین اویسی دوسرے ذاکر نائک بن رہے ہیں: بابل سپریو
مغربی بنگال سے بی جے پی رکن پارلیمنٹ بابل سپریو نے اسدالدین اویسی کے ذریعہ دیے گئے بیانوں کی شدید الفاظ میں مذمت کرتے ہوئے انھیں دوسرا ذاکر نائک قرار دیا ہے۔ بابل سپریو نے کہا کہ اویسی کے بیانات تشدد آمیز ہوتے ہیں اور اگر وہ ضرورت سے زیادہ بولتے ہیں تو ہم یہ بتا دینا چاہتے ہیں کہ ہمارے ملک میں ایک نظام قانون ہے۔

اقبال انصاری نے آل انڈیا مسلم پرسنل لاء بورڈ کی میٹنگ سے کیا کنارہ

بابری مسجد اور رام جنم بھومی مقدمہ میں مسلم فریق انصاری نے آل انڈیا مسلم پرسنل لاء بورڈ کی لکھنؤ میں منعقد ہونے والی میٹنگ کا بائیکاٹ کرنے کا اعلان کیا ہے۔ اقبال انصاری کا کہنا ہے کہ وہ اب اس معاملے کو مزید بڑھانا نہیں چاہتے ہیں۔ اس پر آیا سپریم کورٹ کا فیصلہ ہی سب سے اوپر ہے۔ انھوں نے یہ بھی کہا کہ وہ چاہتے ہیں کہ پورے ملک میں امن کا ماحول رہے۔ اس دوران انھوں نے ملک کے باشندوں سے امن اور آپس میں مل جل کر رہنے کی اپیل بھی کی۔

اندور ٹسٹ: ہندوستان نے بنگلہ دیش کو ایک اننگ اور 130 رن سے دی شکست

اندور ٹسٹ میں ہندوستان نے بہترین کھیل کا مظاہرہ کرتے ہوئے بنگلہ دیش کو ایک اننگ اور 130 رنوں کی شکست فاش دی۔ ہندوستان کی جانب سے محمد شامی نے سب سے زیادہ 4 وکٹ لیے جب کہ 3 وکٹ روی چندرن اشون کو اور 2 وکٹ امیش یادو کو ملے۔ ایشانت شرما کو ایک وکٹ حاصل ہوا۔ بنگلہ دیش کی جانب سے سب سے زیادہ وکٹ کیپر بلے باز مشفق الرحیم نے 64 رن بنائے۔

دہلی میں ہونے والی این ڈی اے کی میٹنگ میں شامل نہیں ہوگی شیوسینا

شیوسینا نے واضح کر دیا ہے کہ دہلی میں منعقد ہونے والی این ڈی اے کی میٹنگ میں وہ شامل نہیں ہوگی۔ شیوسینا لیڈر سنجے راؤت نے اس بات کی تصدیق کی ہے۔ قابل ذکر ہے کہ مہاراشٹر کی سیاست میں مچی ہلچل کے درمیان شیوسینا اور بی جے پی میں تلخیاں لگاتار بڑھ رہی ہیں اور یہی وجہ ہے کہ شیوسینا نے خود کو این ڈی اے سے بالکل الگ تھلگ کر لیا ہے۔

گوا میں جنگی جہاز مگ-29 حادثہ کا شکار

خبر رساں ایجنسی اے این آئی نے ہندوستانی بحریہ کے ذرائع سے یہ خبر دی ہے کہ ٹریننگ سے جڑا مگ-29 جنگی جہاز پرواز بھرنے کے فوراً بعد گوا میں حادثہ کا شکار ہو گیا ہے۔ اس حادثہ میں دونوں پائلٹ محفوظ باہر نکلنے میں کامیاب ہو گئے ہیں۔

اندور ٹسٹ: بنگلہ دیش کی دوسری اننگ بھی لڑکھڑائی، لنچ تک اسکور 4 وکٹ پر 60 رن

پہلی اننگ میں 150 رن پر سمٹ جانے والی بنگلہ دیش کی دوسری اننگ بھی لڑکھڑا گئی ہے۔ آج صبح بلے بازی کے لیے اتری بنگلہ دیش کی ٹیم کو پہلے تو امیش یادو نے جھٹکا دیا اور پھر جلد ہی ایشانت کمار کو بھی ایک وکٹ مل گیا۔ اس کے بعد محمد شامی نے دو وکٹ آؤٹ کر کے بنگلہ دیش کو بیک فٹ پر دھکیل دیا ہے۔ اس وقت تیسرے دن کا لنچ ہو چکا ہے اور بنگلہ دیش کا اسکور 60 رن پر 4 وکٹ ہے۔ بنگلہ دیش اب بھی ہندوستان کی پہلی اننگ کے اسکور سے 283 رن پیچھے چل رہی ہے۔ محمد شامی نے اس اننگ میں 5 اوور میں محض 8 رن دے کر 2 وکٹ لے لیے ہیں۔ میدان میں محمود اللہ اور مشفق الرحیم جمے ہوئے ہیں۔

بہار: موتیہاری کے ایک این جی او میں دھماکہ، 4 افراد ہلاک، 5 سے زائد زخمی

بہار کے موتیہاری واقع سگولی میں ایک این جی او کے باورچی خانے میں علی الصبح دھماکہ ہوا ہے۔ دھماکے میں چار لوگوں کی موت ہو گئی اور پانچ سے زیادہ لوگ زخمی ہو گئے ہیں۔ زخمیوں کو علاج کے لیے اسپتال میں داخل کرایا گیا ہے۔

کچھ لوگوں کو مہاراشٹر میں نئے فارمولے کے بعد پیٹ میں درد ہو رہا ہے: شیوسینا

مہاراشٹر میں بی جے پی کے ذریعہ دوبارہ حکومت بنانے کا دعویٰ کرنے پر شیوسینا نے حملہ بولا ہے۔ شیوسینا نے اپنے ترجمان ’سامنا‘ میں کہا کہ مہاراشٹر میں نئے فارمولے سے کچھ لوگوں کے پیٹ میں درد شروع ہو گیا ہے۔ یہ حملہ شیوسینا نے بی جے پی لیڈر منگنٹیوار کے اس بیان کے بعد دیا جس میں انھوں نے کہا تھا کہ بی جے پی جلد ایک مستحکم حکومت بنائے گی اور اس کے بغیر ریاست میں حکومت سازی ممکن نہیں۔

کیرالہ: آج کھلیں گے سبریمالہ مندر کے دروازے، سیکورٹی انتہائی سخت

کیرالہ میں آج سبریمالہ مندر کے دروازے ایک بار پھر کھولے جائیں گے۔ اس کے ساتھ ہی مینڈلا پوجا کی شروعات ہو جائے گی۔ سبریمالہ میں سیکورٹی انتظامات بہت سخت کر دیے گئے ہیں۔ اس سے قبل سپریم کورٹ نے جمعرات کو سبریمالہ فیصلے پر نظرثانی عرضی کو بڑی بنچ کے حوالے کر دیا تھا۔ قابل ذکر ہے کہ سبریمالہ مندر میں پرانی روایت رہی ہے کہ وہاں 10 سال سے 50 سال کی عمر کی خواتین کو داخلہ نہیں دیا جاتا ہے۔ لیکن سپریم کورٹ نے اس معاملہ میں ایک فیصلہ سناتے ہوئے کہا تھا کہ سبھی عمر کی خواتین کو سبریمالہ مندر میں جانے کی اجازت ہونی چاہیے۔ اس فیصلہ کے بعد سے بھگوان ایپّا کو ماننے والے لوگ کافی ناراض ہوئے اور سڑکوں پر فیصلے کے خلاف احتجاجی مظاہرہ بھی کیا۔ ان کا کہنا ہے کہ یہ فیصلہ واپس لیا جانا چاہیے۔

یہ ایک سینڈیکیٹیڈ فیڈ ہے ادارہ نے اس میں کوئی ترمیم نہیں کی ہے. – Source بشکریہ قومی آواز بیورو—-

اپنی رائے یہاں لکھیں

Discover more from ورق تازہ

Subscribe now to keep reading and get access to the full archive.

Continue reading