ملک میں ملازمتوں پر منڈلاتے خطرے کو لے کر کانگریس جنرل سکریٹری پرینکا گاندھی نے فکر کا اظہار کیا ہے۔ انھوں نے ٹوئٹ کر کہا ہے کہ ’’آٹو سیکٹر میں 10 لاکھ لوگوں کی ملازمت پر خطرہ ہے۔ یہاں کام کر رہے لوگوں کو اپنی روزی روٹی سے نئے ٹھکانے ڈھونڈنے پڑیں گے۔ ختم ہوتے روزگار، کمزور پڑتی تجارت اور معیشت کی کمر توڑنے والی پالیسی پر بی جے پی حکومت کی خاموشی سب سے زیادہ خطرناک ہے۔‘‘
ملک میں ہر سیکٹر کا حال برا ہے۔ نوجوانوں کو ملازمتیں نہیں مل رہی ہیں، بلکہ ملازمتیں دھیرے دھیرے ختم ہی ہوتی جا رہی ہیں۔ اس درمیان آٹو سیکٹر سے بری خبر آئی ہے۔ آٹو سیکٹر میں 10 لاکھ ملازمتوں پر خطرہ منڈلا رہا ہے۔ مودی حکومت کے تازہ فیصلے سے آٹو سیکٹر میں بحران کی کیفیت ہے۔ کمپنیوں نے پروڈکشن کم کر دیا ہے۔
دراصل گاڑیوں اور ان کے پارٹس پر 28 فیصد جی ایس ٹی لگتا ہے۔ اس سے گاڑیوں کا پروڈکشن ویلیو کافی بڑھ جاتا ہے۔ ایک رپورٹ کے مطابق پچھلے 6 مہینوں سے ملک میں گاڑیوں کی فروخت میں لگاتار گراوٹ درج کی گئی ہے۔ ایسے میں پروڈکشن کم ہوتے ہی ملک بھر میں کئی شو روم بھی بند ہو گئے ہیں۔ آٹو سیکٹر میں موجود حالت یہ ہے کہ کمپنیوں کے پاس جو پہلے کا اسٹاک تھا وہ بھی بازار میں فروخت نہیں ہو پا رہا ہے۔ یہی وجہ ہے کہ ملک میں کئی کمپنیوں نے پروڈکشن تقریباً بند کر دیا ہے۔ اس کے ساتھ ہی کمپنیوں نے اپنے ملازمین کو چھٹی پر بھیج دیا ہے۔ اعداد و شمار کے مطابق آٹو سیکٹر ملک کے 50 لاکھ لوگوں کو روزگار دیتا ہے۔
یہ ایک سینڈیکیٹیڈ فیڈ ہے ادارہ نے اس میں کوئی ترمیم نہیں کی ہے. – Source بشکریہ قومی آواز بیورو—-