ناندیڑ، 15 جون:(ورق تازہ نیوز) ناندیڑ پولیس نے "آپریشن کریک ڈاؤن” کے تحت بڑی کارروائی کرتے ہوئے ایک غیر قانونی جوئے کے اڈے پر چھاپہ مارا اور 28 افراد کے خلاف مقدمہ درج کیا۔ اس کارروائی میں پولیس نے تقریباً 18 لاکھ 71 ہزار روپے مالیت کا سامان ضبط کیا ہے۔پولیس کے مطابق ضلع میں غیر قانونی سرگرمیوں کے خلاف مہم کے تحت پولیس سپرنٹنڈنٹ ابیناش کمار کی ہدایت پر جوئے، مٹکا، منشیات اور غیر قانونی ہتھیاروں کے خلاف سخت کارروائیاں جاری ہیں۔
اسی سلسلے میں ناندیڑ سٹی سب ڈویژن کے ڈپٹی سپرنٹنڈنٹ آف پولیس رامیشور وینجنے اور ہوائی اڈہ پولیس اسٹیشن کے انسپکٹر رام داس شینڈگے کی قیادت میں مشترکہ ٹیم نے کارروائی انجام دی۔پولیس کو خفیہ اطلاع ملی تھی کہ گڈیگاؤں روڈ، کامٹھا علاقے میں جگن لال یادو کی جگہ پر کچھ افراد سرکاری اجازت یافتہ تفریحی مرکز کا بہانہ بنا کر غیر قانونی طور پر "پپلُو” نامی تاش کا جوئے کا کھیل رقم لگا کر کھیل رہے ہیں اور کھلا رہے ہیں۔
اطلاع کی تصدیق کے بعد 13 جون کی رات پولیس نے موقع پر چھاپہ مارا اور 28 افراد کو حراست میں لے لیا۔ اس دوران جوئے میں استعمال ہونے والا سامان، 320 پلاسٹک کوائنز، 20 موبائل فون، 8 موٹر سائیکلیں اور 2 کاریں ضبط کی گئیں۔ ضبط شدہ سامان کی مجموعی مالیت 18.71 لاکھ روپے بتائی گئی ہے۔اس معاملے میں ہوائی اڈہ پولیس اسٹیشن میں جرم نمبر 274/2026 کے تحت مقدمہ درج کیا گیا ہے۔
گرفتار افراد میں شبھم سنجے سنگھ ٹھاکر، وجئے سنگھ کرن سنگھ ٹھاکر، ستیہ نارائن وجئے سنگھ بیس، سومیشور آچمارے، پرکاش جمداڑے، شیخ شفیع، سونو ٹھاکر، کندن سوریہ تل، راجو سنگھ ٹھاکر، محمد غوث، وکرم سنگھ پرمار اور عدنان علی سمیت دیگر ملزمان شامل ہیں۔پولیس نے بتایا کہ کیس کی مزید تفتیش سب انسپکٹر لوکھنڈے کر رہے ہیں۔ کامیاب کارروائی انجام دینے والی پولیس ٹیم کو پولیس سپرنٹنڈنٹ ابیناش کمار نے سراہتے ہوئے مبارکباد دی ہے۔