24گھنٹے خدمات لیکن تعلیمی وظیفے کے نام پر محض 15/ہزار
انٹرن شپ کرنے والے ریزیڈنٹ ڈاکٹروں کی شرد پوار سے ملاقات
دیگرمیونسپل کارپوریشن 50 ہزار تنخواہ دیتی ہے، پھر دنیا کی سب سے امیر ممبئی میونسپل کارپوریشن کیوں نہیں دیتی؟
ممبئی:ممبئی میونسپل کارپوریشن کے اسپتالوں میں گزشتہ کئی سالوں سے انٹرن شپ کرنے والے ریزیڈنٹ ڈاکٹر وں کو 50ہزار روپئے وظیفہ دیئے جانے کے مطالبے کے ساتھ آج بی ایم سی کے سی پی ایس اسٹوڈنٹس ایسوسی ایشن کے ریزیڈنٹ ڈاکٹروں نے این سی پی کے قومی سربراہ شردپوار سے ملاقات کرتے ہوئے میمورنڈم دیا۔ملاقات کے دوران ہی شردپوار نے بی ایم سی کے کمشنر اقبال سنگھ چہل کو کال کیا جس کے بعدکمشنر نے فوری طور پر ریزیڈنٹ ڈاکٹروں کو 50ہزار روپئے وظیفہ دینے کا اعلان کردیا۔
ممبئی میونسپل کارپوریشن کے اسپتالوں میں انٹرن شپ کرنے والے میڈیکل طلباء کو پچھلے 10 سے 15 سالوں سے صرف 15/ہزار روپئے وظیفہ دیا جاتا ہے۔جبکہ ریاست کے دیگر کارپوریشنوں میں رہائشی ڈاکٹروں کو 50 ہزار روپئے سے زیادہ وظیفہ ملتا ہے۔گزشتہ سال ممبئی میونسپل کارپوریشن نے فیس نہیں لی تھی لیکن اس سال اس نے انٹرن شپ کے ہر طالب علم سے ایک لاکھ پندرہ ہزار روپے وصول کیے ہیں۔ یہ ریذیڈنٹ ڈاکٹرز دیگر ڈاکٹروں کی طرح 24 گھنٹے خدمات فراہم کر رہے ہیں۔ فی الحال میونسپل انتظامیہ ان طلباء کی طرف سے ادا کی گئی فیس تنخواہ کی شکل میں واپس کر رہی ہے۔ اس کا مطلب ہے کہ ان ڈاکٹروں سے ایم بی بی ایس مکمل کرنے کے تک ممبئی میونسپل اسپتالوں میں 24 گھنٹے مفت کام لیا جاتا ہے۔ ایسوسی ایشن نے اپنے میمورنڈم میں سوال کیا کہ جب نیو ممبئی، پونے، پمپری چنچوڑ کی میونسپل کارپوریشن طلباء کو 50 ہزار روپے ادا کر رہی ہے تودنیا کی سب سے امیر ممبئی میونسپل کارپوریشن ریزیڈنٹ ڈاکٹروں کو اتنی کم تنخواہ کیوں دیتی ہے؟
ایسوسی ایسن نے شردپوار کو دیئے گئے اپنے میمورنڈم میں یہ بھی کہا ہے کہ ممبئی کے میونسپل اسپتالوں میں کام کرنے والے ریزیڈنٹ ڈاکٹروں پر ان کے گھروں کی بھی ذمہ داری ہوتی ہے۔ایسی صورت میں اتنی کم تنخواہ میں کام لے کر ممبئی میونسپل کارپوریشن ریزیڈنٹ ڈاکٹروں کے ساتھ ناانصافی کررہی ہے۔شردپوار سے ملاقات کرنے والے ایسوسی ایشن کے وفد میں صدرڈاکٹر انیکیت ماول، ڈاکٹر روشن گائیکواڑ، ڈاکٹر آدتیہ ماول اور دیگر نمائندے موجود تھے۔
