وزیرِاعظم نے اپنے خطاب میں بارش اور سیلاب کا ذکر تک نہیں کیا: ہرش وردھن سپکال
وزیرِاعظم خود اپنے نام پر ہوائی اڈے کا نام رکھنا چاہتے تھے، اسی لیے ڈی بی پاٹل کے نام کا اعلان نہیں کیا گیا
ممبئی حملے کے مجرم کو کانگریس حکومت نے پھانسی دی، پلوامہ حملے کے مجرم کہاں ہیں؟
ممبئی: مہاراشٹر میں کسان شدید بارش اور سیلاب سے تباہ ہو چکے ہیں، لیکن وزیرِاعظم نریندر مودی نے آج ایک شاندار تقریب میں ہوائی اڈے کا افتتاح کر کے اپنی تشہیری بھوک مٹائی، جبکہ سیلاب زدہ کسانوں کی مدد پر ایک لفظ تک نہیں کہا۔ عوام کی زندگی اور موت سے زیادہ وزیرِاعظم کو انتخابات اور تشہیر کی فکر ہے، یہ بات آج ایک بار پھر ثابت ہو گئی، یہ سخت تنقید مہاراشٹر پردیش کانگریس کمیٹی کے صدر ہرش وردھن سپکال نے کی۔
میڈیا سے گفتگو کرتے ہوئے ہرش وردھن سپکال نے کہا کہ وزیرِاعظم نریندر مودی ممبئی آئے اور ہمیشہ کی طرح اپنی تعریف میں ہی مصروف رہے۔ نامکمل ہوائی اڈے کے افتتاحی جلسے میں بھی انہوں نے کانگریس پر ہی تنقید کی، لیکن نوی ممبئی کے ہوائی اڈے کو مرحوم ڈی بی پاٹل کے نام سے منسوب کرنے کا اعلان نہیں کیا۔ دراصل وہ خود چاہتے تھے کہ اس ہوائی اڈے کا نام ان کے اپنے نام پر رکھا جائے، اسی لیے انہوں نے ڈی بی پاٹل کے نام کا اعلان نہیں کیا۔ انہوں نے کہا کہ وزیرِاعظم نے عوام سے جو وعدے کیے تھے، جیسے ہر سال دو کروڑ روزگار دینا، ہر شہری کے بینک کھاتے میں پندرہ لاکھ روپے جمع کرنا، کسانوں کو لاگت کی قیمت سے ڈیڑھ گنا امدادی قیمت دینا اور سو اسمارٹ سٹی بنانے کے وعدے، ان سب کا کیا ہوا؟ اس کا کوئی جواب وزیرِاعظم نے نہیں دیا۔
وزیرِاعظم نے اپنے خطاب میں کانگریس پر حملہ تو ضرور کیا، مگر یہ یاد نہیں دلایا کہ یہی کانگریس حکومت تھی جس نے پاکستان کے دو ٹکڑے کیے تھے۔ یہی کانگریس حکومت تھی جس نے ممبئی حملے کے مجرم کو پھانسی دی تھی۔ جبکہ مودی حکومت نے پاکستان کی خفیہ ایجنسی آئی ایس آئی کو پٹھان کوٹ حملے کی تفتیش کے لیے بھارت آنے کی اجازت دی تھی۔ پلوامہ میں تین سو کلو آر ڈی ایکس کے ساتھ دہشت گردوں نے حملہ کیا، لیکن مودی حکومت انہیں پکڑ نہ سکی۔ پہلگام حملے کا انجام سب کے سامنے ہے۔ لہٰذا مودی کو کانگریس پر الزام تراشی کے بجائے یہ وضاحت کرنی چاہیے کہ انہوں نے امریکی دباؤ میں آ کر’آپریشن سندور‘کو کیوں روک دیا۔
سپکال نے کہا کہ وزیرِاعظم جیسے عہدے پر فائز شخص سے یہ توقع کی جاتی ہے کہ وہ قومی سلامتی کے معاملے پر ذمہ داری سے بات کرے، مگر مودی نے غیر ذمہ دارانہ انداز میں بیان دے کر اور قومی سلامتی جیسے حساس موضوع کو سیاسی فائدے کے لیے استعمال کر کے اپنے عہدے اور رازداری کی حلف کی خلاف ورزی کی ہے، جو کہ صریحاً غیر اخلاقی اور غیر دستوری عمل ہے۔ انہوں نے یاد دلایا کہ دس سال قبل مودی نے بہار کے انتخابات کے دوران ممبئی آ کر اندو مل میں ڈاکٹر بابا صاحب امبیڈکر کے یادگار منصوبے کا سنگِ بنیاد رکھا تھا، لیکن آج تک اس کا کام مکمل نہیں ہوا۔ 2017 میں ممبئی میونسپل انتخابات سے پہلے انہوں نے بحرِ عرب میں چھترپتی شواجی مہاراج کے مجسمے کی تعمیر کے لیے جل پوجن کیا تھا، مگر وہ منصوبہ بھی آج تک ادھورا ہے۔ نوی ممبئی کا ہوائی اڈہ، جس کا آج افتتاح کیا گیا، وہ بھی ابھی مکمل نہیں ہوا، مگر بلدیاتی انتخابات سے قبل جلدبازی میں اس کا افتتاح کر دیا گیا۔
MPCC Urdu News 8 October 25.docx