حق رائے دہندگی کے لیے ووٹر لسٹ میں نام درج ہونا ضروری
نام درج کرنے کی آخری تاریخ 19 اکتوبر تک – چیف الیکشن آفیسر ایس چوککلنگم
تھانے (آفتاب شیخ)
مہاراشٹرا میں 2024 کی اسمبلی انتخابات کا شیڈول جاری کر دیا گیا ہے، اور 20 نومبر کو ریاست کے تمام 288 اسمبلی حلقوں میں ایک ہی مرحلے میں ووٹنگ ہوگی۔ اس الیکشن میں اپنے ووٹ کے حق کا استعمال کرنے کے لیے، آپ کا نام ووٹر لسٹ میں شامل ہونا ضروری ہے۔ جن لوگوں نے ابھی تک اپنا نام ووٹر لسٹ میں شامل نہیں کیا ہے، ان کے پاس 19 اکتوبر 2024 تک اپنا نام درج کرانے کا موقع ہے۔ اس لیے ہر ووٹر کو یہ یقینی بنانا چاہیے کہ ان کا نام ووٹر لسٹ میں شامل ہو چکا ہے۔ جنہوں نے ابھی تک اپنا نام درج نہیں کیا ہے، انہیں 19 اکتوبر کی آخری تاریخ تک اپنا نام ووٹر لسٹ میں درج کرانا چاہیے تاکہ ووٹنگ کے دن اپنے حق رائے دہی کا استعمال کر سکیں۔ یہ اپیل چیف الیکشن آفیسر اور پرنسپل سیکریٹری ایس چوککلنگم نے کی ہے۔
انہوں نے مزید کہا کہ جو لوگ ابھی تک اپنا نام ووٹر لسٹ میں درج نہیں کروا سکے ہیں، ان کے لیے 19 اکتوبر کی رات تک آن لائن یا آف لائن طریقے سے اپنا نام درج کرانے کا موقع موجود ہے۔ مستقل ووٹر رجسٹریشن ابھی جاری ہے، اور 19 اکتوبر تک موصول ہونے والے فارم نمبر 6 کو ووٹر لسٹ میں شامل کرنے پر غور کیا جائے گا، بشرطیکہ درخواستیں امیدواروں کے نامزدگی کاغذات جمع کرانے کی آخری تاریخ سے 10 دن پہلے تک موصول ہو جائیں۔ ایس چوککلنگم نے اپیل کی ہے کہ اس موقع سے فائدہ اٹھائیں اور تمام اہل شہری اپنے نام ووٹر لسٹ میں شامل کروا کر اپنے ووٹ کا حق استعمال کریں، اور تمام ووٹر فوری طور پر یہ تصدیق کریں کہ ان کا نام ووٹر لسٹ میں شامل ہے۔
waraquetaza Online Urdu News