رانچی۔24۔جون۔جھارکھنڈ کے کھرسوان ضلع میں چوری کے شک میں بھیڑ نے ایک مسلم نوجوان کو بجلی کے کھمبے سے باندھ کر جم کر پٹائی کی ۔ اب علاج کے دوران اس کی موت ہوگئی ہے ۔ اتنا ہی نہیں بھیڑ نے مسلم نوجوان سے بار بار جے شری رام کے نعرے بھی لگوائے ۔ اس واقعہ کا ویڈیو سوشل میڈیا پر تیزی سے وائرل ہوگیا ہے ، جس کی بنیاد پر پولیس نے کیس درج کرلیا ہے ۔
بتایا جارہا ہے کہ 24 سال کے تبریز انصاری جمشید پور سے اپنے گاوں واپس لوٹ رہے تھے ، اسی وقت انہیں گھاتکی ڈیہہ نام کے گاوں میں بھیڑ نے چوری کے شک میں گھیر لیا ۔ چوری کا الزام لگاتے ہوئے لوگوں نے اس کو پول سے باندھ دیا اور بری طرح سے پٹائی کردی ۔ تبریز انصاری کو کئی گھنٹوں تک پیٹا گیا ۔ اس کے بعد 18 جون کو اس کو پولیس کے حوالے کردیا گیا ۔ عدالت نے تبریز کو عدالتی حراست میں بھیج دیا ۔ 22 جون کو اس کو انتہائی نازک حالت میں اسپتال میں بھرتی کروایا گیا ، جہاں علاج کے دوران اس کی موت ہوگئی ۔