گورنر کو مانیک راؤ کوکاٹے کو برطرف کرنا چاہیے، اسمبلی کی رکنیت منسوخ کیا جائے: ہرش وردھن سپکال
بی جے پی حکومت بدعنوان وزراء کا دفاع کر رہی ہے، اپوزیشن اور حکمران جماعت کے لیے الگ الگ انصاف کیوں؟
ممبئی (آفتاب شیخ)
مہاراشٹر پردیش کانگریس کمیٹی کے صدر ہرش وردھن سپکال نے گورنر سے مطالبہ کیا ہے کہ وہ وزیر زراعت مانیک راؤ کوکاٹے کو فوری طور پر برطرف کریں اور ان کی اسمبلی کی رکنیت منسوخ کریں، کیونکہ عدالت نے انہیں دھوکہ دہی کے جرم میں دو سال قید کی سزا سنائی ہے۔ سپکال نے کہا کہ سابق وزیراعظم لال بہادر شاستری نے محض ایک ٹرین حادثے کی اخلاقی ذمہ داری قبول کرتے ہوئے استعفیٰ دیا تھا، مگر بی جے پی حکومت نے تمام اخلاقیات کھو دی ہیں۔
ہرش وردھن سپکال نے مہاراشٹر ایس ٹی ورکرز کانگریس کے زیر اہتمام خون کے عطیہ کیمپ کے دوران میڈیا سے گفتگو کرتے ہوئے کہا کہ جب کانگریس رہنما راہل گاندھی کو جھوٹے مقدمے میں سزا ہوئی تو ان کا ایم پی کا درجہ فوراً منسوخ کر دیا گیا، مگر مانیک راؤ کوکاٹے کے معاملے میں الگ رویہ اپنایا جا رہا ہے۔ یہ دوہرے انصاف کی بدترین مثال ہے، جو جمہوریت کے لیے خطرناک ہے۔
شیواجی مہاراج کے ماولے اور آر ایس ایس کے رضاکار برابر نہیں ہوسکتے
گووندگیری مہاراج کے بیان پر ردعمل دیتے ہوئے سپکال نے کہا کہ چھترپتی شیواجی مہاراج کے ماولے سوراجیہ کے لیے لڑنے والے بہادر سپاہی تھے، جبکہ سنگھ کے رضاکاروں کا ان سے کوئی موازنہ نہیں کیا جا سکتا۔ سنگھ کے نظریے نے ہمیشہ چھترپتی شیواجی اور سنبھاجی مہاراج کے کارناموں کو مسخ کرنے کی کوشش کی ہے۔ سپکال نے مزید کہا کہ آر ایس ایس، جیرٹاپ پر قبضہ کرکے مہاراج کی علامت کو کمزور کرنے کی سازش کر رہا ہے۔
کمبھ میلے کو سیاسی رنگ دیا جا رہا ہے
مہاکمبھ میلے پر تبصرہ کرتے ہوئے سپکال نے کہا کہ یہ کوئی سیاسی میدان نہیں ہے، لیکن مودی-یوگی حکومت نے اسے انتخابی مہم بنا دیا ہے۔ بدانتظامی کے باعث بھگدڑ میں عقیدت مندوں کی جانیں گئیں، جو ناقابل معافی ہے۔ اگر مناسب انتظامات کیے جاتے تو زائرین کو بہتر سہولیات میسر آتیں۔
ایس ٹی مہاراشٹر کی لائف لائن، حکومت مالی مدد دے
مہاراشٹر ایس ٹی کانگریس کے خون عطیہ کیمپ میں خطاب کرتے ہوئے سپکال نے ایس ٹی بس سروس کی اہمیت اجاگر کی اور حکومت سے مطالبہ کیا کہ ایس ٹی کارپوریشن کو مالی امداد فراہم کرے تاکہ رعایتی سہولیات جاری رہ سکیں۔ اس موقع پر مہاراشٹر ایس ٹی کانگریس کے جنرل سیکریٹری شری رنگ برگے سمیت دیگر عہدیدار بھی موجود تھے۔
