کلاشنکوف کی نئی الیکٹرک کار

کلاشنکوف کی شہرت کی وجہ اس کی AK-47 مشین گن ہے اور اس کمپنی کا نام ابھی تک عوامی سطح پر ہتھیار سازی کی وجہ سے ہی مشہور ہے۔

روسی ہتھیار ساز اس کمپنی نے جمعرات کے دن ماسکو کے نواح میں ایک ڈیفنس ایکسپو میں اس نئی کار کا پروٹو ٹائپ ڈیزائن پیش کیا۔ اس نئی برقی گاڑی کا نام CV- 1 رکھا گیا ہے۔

اسلحہ ساز کمپنی کلاشنکوف کنسرن نے روسی میڈیا کو بتایا ہے کہ اس الیکٹرک کار میں جو نئی ٹیکنالوجی استعمال کی جا رہی ہے، وہ ایلون مُسک کی ٹیسلا کی بنائی جا رہی کاروں کی حریف ثابت ہو گی۔

اس کمپنی کی طرف سے جاری کیے گئے ایک بیان کے مطابق کلاشنکوف کی نئی CV-1 برقی کار ایک مرتبہ چارج کرنے کے بعد ساڑھے تین سو کلو میٹر تک چلائی جا سکے گی۔ تاہم اس کار کے پرانے زمانے کے ڈیزائن پر ملا جلا ردعمل ظاہر کیا جا رہا ہے۔

اس نئی برقی کار کا رنگ ہلکا نیلا ہے جبکہ گاڑی کے اگلے حصے پر نصب جالی کافی بڑی ہے۔ اس گاڑی کے دروازوں کے ہینڈل بھی ماضی کی گاڑیوں کی یاد تازہ کر دیتے ہیں۔

کلاشنکوف نے اپنی ویب سائٹ پر جاری کیے گئے ایک بیان میں یہ بھی کہا ہے کہ اس نئی برقی کار کا ڈیزائن ستر کے عشرے میں بنائے جانے والی سوویت گاڑی Izh-Kombi کے ڈیزائن سے متاثر ہو کر تخلیق کیا گیا ہے۔

یہ امر اہم ہے کہ کلاشنکوف کنسرن حالیہ سالوں کے دوران اپنے برانڈ کو وسعت دینے کی کوششوں میں ہے۔ اب یہ کمپنی سول شعبے میں استعمال کی جانے والی مصنوعات بھی بنا رہی ہے، جن میں ملبوسات، چھتریاں اور موبائل فونز کے کورز بھی شامل ہیں۔