नांदेड – लोहा नगरपालिकेच्या निवडणुकीचा प्रचार शिगेला पोहोचला आहे. भाजप विरुद्ध काँग्रेस अशी सरळ लढत असली तरी ‘धनुष्यबाण’ ही ‘हातात’ सज्ज आहे, तर ‘घड्याळाचे’ काटे जागेवरच थांबले आहेत. त्यामुळे आपोआपच ‘घडी’ ही ‘हाता’लाच बांधली जाईल असे चित्र आहे. म्हणून पुन्हा एकदा ‘सर्वजण मिळून’ चिखलीकर यांना घेरण्याच्या प्रयत्नात आहेत. एकंदरीत निवडणुकीला चांगलाच रंग भरला असून लोह्यात चिखलीकरांचे ‘कमळ’ फुलणार की चव्हाणांच्या ‘हाताची’ जादू कायम राहणार, याबाबत उत्सुकता कायम आहे.जिल्ह्यातील लोहा नगरपालिका शिवसेनेचे आमदार प्रतापराव पाटील चिखलीकर यांच्या मतदारसंघात येते. नांदेड महानगरपालिकेच्या निवडणुकीदरम्यान चिखलीकर यांनी भाजपसोबत हातमिळवणी केली आहे. तेंव्हापासून त्यांनी भाजपचे ‘कमळ’ हातात घेतले असून कमळाच्या निशाणीवरच लोहा नगरपालिकेतील सर्व उमेदवार उभे केले आहेत.