Waraqu E Taza Online
Nanded Urdu News Portal - ناندیڑ اردو نیوز پورٹل

نیٹ(NEET) میں شعیب آفتاب نے صد فیصد نمبرات کے ساتھ ملک بھر میں ٹاپ کیا

نئی دہلی 16 اکتوبر(یواین آئی) پورے ملک میں میڈیکل کالجوں میں گریجویٹ اور پوسٹ گریجویٹ پروگرام میں داخلہ کے لیے منعقد آل انڈیا اہلیت امتحان (نیٹ-2020)کے نتائج آج جاری کیے گئے جس میں شعیب آفتاب نے 720 میں سے 720 نمبر لاکر ٹاپ کیا ہے۔

نیٹ کا نتیجہ نیشنل ٹیسٹنگ ایجنسی(این ٹی اے)کی سرکاری ویب سائٹ این ٹی اے این ای ای ٹی ڈاٹ این آئی سی ڈاٹ ان پر جاری کیاگیا ہے۔رزلٹ کے ساتھ این ٹی اے نے فائنل آنسر شیٹ بھی جاری کردیا ہے۔اس امتحان میں شعیب آفتاب نے 720 میں سے 720 نمبر حاصل کرکے نمبر ایک پوزیشن حاصل کی۔شعیب نے اس کے علاوہ اڈیشہ میں پہلی بار نیٹ ٹاپر بن کر تاریخ رقم کردی ہے۔صد فیصد نمبر حاصل کرنے والے شعیب کے اہل خانہ اپنے بیٹے کی محنت اور جذبے سے خوش ہیں۔

اس امتحان کے لیے کل 15.97 لاکھ امیدواروں نے رجسٹریشن کروایا تھا۔ ان میں سے 85 فیصد سے 90 فیصد امیدوارامتحان میں شریک ہوئے تھے۔اس سال تقریباً 14.37 لاکھ سے زائد امیدوار کورونا وبا کے باوجود 13 ستمبر داخلہ امتحان میں شامل ہوئے تھے۔کنٹینمنٹ زون میں ہونے کے سبب جو طلبہ امتحان نہیں دے پائے تھے ان کے لیے 14 اکتوبر کو دوبارہ امتحان منعقد کیا گیا تھا اس لیے رزلٹ میں بھی تھوڑی تاخیر ہوگئی۔اس امتحان میں کامیاب ہونے والے امیدواروں کو ملک کے سرکاری اور پرائیویٹ میڈیکل کالجوں میں ایم بی بی ایس اور بی ڈی ایس کورسزمیں ایڈمیشن ملے گا۔