لکھنؤ :ریاست اتر پردیش میں نوجوان لڑکا دلہن کی طرح تیار ہو کر شادی میں گھس گیا، نقلی بال اترنے پر پکڑا گیا، ویڈیو سوشل میڈیا پر وائرل ہوگئی . ایشیا میں ہاتھ سے بننے والے قالینوں کے سب سے بڑے مرکز بھدوہی شہر میں یہ دلچسپ واقعہ پیش آیا جہاں ایک نوجوان لڑکا دلہن کی طرح تیار ہو کر شادی والے گھر میں گھس گیا اور خواتین کے درمیان بیٹھا رہا .

اجنبی "عورت” کو دیکھ کر گھر والے پریشان ہوگئے. اسی دوران ایک خاتون نے لڑکی کے سر پر ہاتھ رکھا تو اس کے نقلی بالوں کی وِگ اتر گئی جس پر گھر میں ہنگامہ برپا ہوگیا. سوشل میڈیا پر وائرل ویڈیو میں دیکھا جاسکتا ہے کہ لوگ نوجوان کا گھونگھٹ ہٹانے اور اس کی پہچان جاننے کی کوشش کر رہے ہیں. آدھے گھنٹے تک گھر میں یہ ہنگامہ برپا رہا، اس دوران گھر والوں نے پولیس کو خبر دینے کی کوشش کی تو نوجوان اپنے ساتھیوں کے ساتھ موٹرسائیکل پر بیٹھ کر فرار ہوگیا. ابھی تک یہ واضح نہیں ہوسکا ہے کہ یہ نوجوان دلہن کی طرح تیار ہو کر شادی والے گھر میں کیا کرنے آیا تھا.