مہاراشٹر سیاسی ہلچل LIVE: بی جے پی لیڈروں کی گورنر سے ملاقات ختم، سامنے آیا بڑا بیان

بی جے پی لیڈروں کی گورنر کوشیاری سے ملاقات ختم

ممبئی میں بی جے پی لیڈروں کی گورنر بھگت سنگھ کوشیاری سے ملاقات ختم ہو گئی ہے۔ اس ملاقات کے بعد مہاراشٹر بی جے پی صدر چندر کانت پاٹل نے کہا کہ ’’مہاراشٹر کے لوگوں نے ’مہایوتی‘ (اتحاد) کو مینڈیٹ دیا ہے۔ حکومت بنانے میں تاخیر ہو رہی ہے۔ آج ہم ریاست میں قانونی متبادل اور سیاسی حالات پر تبادلہ خیال کرنے کے لیے گورنر سے ملے۔‘‘

شیوسینا کی میٹنگ ختم، سبھی ایم ایل اے بھیجے جا رہے ’رنگ شاردا ہوٹل‘

ممبئی میں شیو سینا کے اراکین اسمبلی کی میٹنگ ختم ہو گئی ہے۔ سربراہ ادھو ٹھاکرے نے پارٹی کے اراکین کے ساتھ میٹنگ کے بعد دو ٹوک میں کہہ دیا ہے کہ جو کچھ بی جے پی کے ساتھ پہلے سے طے ہوا تھا اس سے کم پر وہ بالکل بھی نہیں ماننے والے۔ انھوں نے کہا کہ ’’بی جے پی لیڈروں سے میری کوئی بھی سیدھی بات نہیں ہوئی ہے، ہمارے پاس سبھی متبادل ہیں، لیکن ہم نہیں چاہتے کہ ان پر ہم غور کریں۔‘‘ اس درمیان کچھ میڈیا ذرائع نے خبر دی ہے کہ میٹنگ کے بعد شیوسینا ایم ایل رنگ شاردا ہوٹل بھیجے جا رہے ہیں۔ ذرائع کے مطابق ایک شیو سینا رکن اسمبلی نے کہا کہ وہ سبھی ایک ساتھ رہیں گے اور ادھو ٹھاکرے کے مطالبات کو لے کر سبھی متحد ہیں۔

مہاراشٹر: فڑنویس کی قیادت میں حکومت بنائی جانی چاہیے… نتن گڈکری

مہاراشٹر میں حکومت تشکیل کو لے کر مرکزی وزیر نتن گڈکری نے بڑا بیان دیا ہے، انہوں نے کہا کہ جلد ہی کوئی فیصلہ ہوگا، انہوں نے یہ بھی صاف کیا کہ مہاراشٹر میں دیویندر فڑنویس کی قیادت میں حکومت بنائی جانی چاہیے، گڈکری نے کہا کہ آر ایس ایس اور موہن بھاگوت کا اس سے کوئی تعلق نہیں ہے۔

مہاراشٹر میں اگلے وزیر اعلی کے خود کے نام پر نتن گڈکری نے کہا کہ میرے لئے مہاراشٹر واپس لوٹنے کا کوئی سوال نہیں ہے، میں دہلی میں کام کرنا جاری رکھوں گا۔

وزیر اعلیٰ شیو سینا سے ہی ہوگا: سنجے راؤت

ایک بار پھر شیوسینا کے قومی ترجمان سنجے راؤت نے واضح لفظوں میں کہہ دیا ہے کہ مہاراشٹر میں وزیر اعلیٰ شیوسینا سے ہی ہوگا۔ ان کے اس انداز سے واضح ہو رہا ہے کہ اگر بی جے پی انھیں ڈھائی سال کے لیے وزیر اعلیٰ کا عہدہ نہیں دیتی تو پھر بی جے پی-شیوسینا اتحاد ختم ہو سکتا ہے۔ بی جے پی کی جانب سے ابھی تک اس سلسلے میں کچھ بھی واضح بیان نہیں آیا ہے۔ وزیر اعلیٰ دیویندر فڑنویس نے بھی خاموشی اختیار کر رکھی ہے اور صرف سرکردہ لیڈروں سے ملاقات کر رہے ہیں۔ چونکہ آج بی جے پی کے سینئر لیڈروں کا ایک وفد گورنر بھگت سنگھ کوشیاری سے ملنے والا ہے، اس لیے امکان ظاہر کیا جا رہا ہے کہ اس ملاقات کے بعد بی جے پی کی جانب سے کوئی بیان آ سکتا ہے۔

ہم اپنے اراکین اسمبلی کو کہیں شفٹ نہیں کرنے جا رہے: سنجے راؤت

شیوسینا کے قومی ترجمان سنجے راؤت نے ان خبروں کی تردید کی ہے جس میں کہا جا رہا ہے کہ شیوسینا اپنے اراکین اسمبلی کو کسی ریسورٹ میں شفٹ کرنے جا رہی ہے تاکہ بی جے پی کے ذریعہ اراکین اسمبلی کی مبینہ خرید و فروخت کو ناکام یا جا سکے۔ سنجے راؤت نے کہا کہ ’’ہمیں ایسا کرنے کی کوئی ضرورت نہیں ہے، ہمارے اراکین اسمبلی ہمارے ساتھ مضبوطی کے ساتھ کھڑے ہیں۔ جو لوگ اس طرح کی افواہیں پھیلا رہے ہیں انھیں پہلے اپنے اراکین اسمبلی کی فکر کرنی چاہیے۔‘‘

شیوسینا کے تلخ تیور سے پریشان بی جے پی لیڈروں کا وفد آج گورنر کوشیاری سے کرے گا ملاقات

مہاراشٹر میں سیاسی سرگرمیاں مزید عروج پر پہنچ گئی ہیں۔ ایک طرف شیو سینا اپنے رخ کو نرم نہیں کر رہی اور دوسری طرف بی جے پی حکومت سازی کے لیے پورا زور لگا رہی ہے۔ اسی درمیان مہاراشٹر بی جے پی کے سینئر لیڈروں پر مشتمل ایک وفد آج گورنر بھگت سنگھ کوشیاری سے ملاقات کرنے والا ہے۔ اس وفد کی قیادت پارٹی کے ریاستی صدر چندرکانت پاٹل کریں گے۔ امکان ظاہر کیا جا رہا ہے کہ بی جے پی لیڈران گورنر سے ملاقات کر سیاسی حالات اور حکومت سازی کے امکانات پر تبادلہ خیال کریں گے۔

یہ ایک سینڈیکیٹیڈ فیڈ ہے ادارہ نے اس میں کوئی ترمیم نہیں کی ہے. – Source بشکریہ قومی آواز بیورو—-

Leave a comment