ممبئی14 نومبر(یواین آئی) مہاراشٹر میں حکومت کی تشکیل کے لیے آج کانگریس ،این سی پی اور شیوسینا کی ایک مشترکہ اجلاس منعقد کیا گیا ،جس میں کئی اہم معاملات پر غور وخوض کیا گیا ہے ،اور ذرائع کے مطابق ریاست میں نئی حکومت کے لیے مشترکہ اقل ترین پروگرام (سی ایم پی) تیارکرلیا گیا اور جلدہی حکومت سازی کی کوشش شروع ہوجائے گی۔ پہلی بار تینوں پارٹیوں کے لیڈران ایک ساتھ جمع ہوئے ہیں۔تیار شدہ مسودے کو تینوں پارٹیوں کے ہائی کمان کو بھیجا جائے گا.
ایک این سی پی رہنما کے مطابق ، اس اجلاس میں فیصلہ کیا گیا ہے کہ ممبئی میں تینوں سیاسی پارٹیوںکے مابین باہمی معاہدے کے بعد سونیا گاندھی اور شرد پوار ایک بار پھر دہلی میں ملاقات کریں گے۔ پوری مشق کو 15-20 دن میں مکمل کرنے اور حکومت بنانے کی کوشش کی جائے گی۔تینوں پارٹیوں کی پہلی میٹنگ میں کانگریس کے سابق وزیراعلیٰ پرتھوی راج چوان،ایوان کے لیڈروجے ویڈٹیوار ،مانک راﺅ ٹھاکرے ،این سی پی کی طرف سے ریاستی صدرجینت پاٹل ،سنیئر لیڈرچھگن بھجبل ،ترجمان نواب ملک ،شیوسینا کے ایوان میں لیڈرایکناتھ شندے ،سنیئر لیڈرسبھاش ڈیسائی وغیرہ شامل رہے ۔
بتایا جاتا ہے کہ تینوں پارٹیوں کی طویل ملاقاتوں کا مقصدیہ ہے کہ ریاست سے صدرراج کا خاتمہ کروایا جائے اور بی جے پی کو اقتدار سے دوررکھتے ہوئے ریاست میں پانچ سال کے لیے ایک پایہ دار اور مضبوط حکومت تشکیل دی جائے ۔واضح رہے کہ مہاراشٹراسمبلی انتخابات کے نتائج کے آنے کے نصف ماہ گزرجانے کے بعد بھی حکومت سازی میں کسی بھی پارٹی کے آگے نہ آنے کے بعد گورنر نے صدرراج کی سفارش کردی تھی ،اس سے قبل انہوںنے بی جے پی ،پھر شیوسینا اور این سی پی کو طلب کرکے حکومت سازی کے سلسلہ میں وقت دیا تھا،لیکن ایسا نہ ہونے پر صدرراج نافذ کردیا گیا۔