ریاض : ممتاز سعودی عالم عالمی شہرت یافتہ قاری و خطیب شیخ عبد الرحمٰن السدیس نے کہا ہے کہ فلسطین پوری امتِ مسلمہ کا مسئلہ ہے۔سعودی نشریاتی ادارے رائے الیوم کے مطابق مکہ مکرمہ کے امام اور خطیب شیخ عبد الرحمن السدیس نے اس بات پر زور دیا کہ قبلہ اول مسجد اقصیٰ ، ہر مسلمان کے دل میں رہنا چاہئے۔انہوں نے ہر مسلمان سے مطالبہ کیا کہ وہ مسجد اقصیٰ کے مسئلے پر کسی بھی قسم کی تسلی کو قبول نہ کریں اور نہ اس مسئلے سے آنکھیں چرائیں۔ فلسطین کی حمایت کریں اور دعا کریں۔السدیس نے اس بات کا اعادہ کیا کہ فلسطین ہر مسلمان کا مسئلہ ہے اور اس کے لئے مسجد اقصی کو قابضین سے آزاد کرانے کی ضرورت ہے۔

فلسطین کا اسرائیل کو سخت انتباہ
غزہ : اسلامی تحریک مزاحمت حماس کے عسکری بازو عزالدین قسام بریگیڈ اور دوسری مزاحمتی تنظیموں نے مسجد اقصیٰ کے خلاف اسرائیلی ریاست کی جاری سازشوں اور یہودی بلوائیوں کے منظم اشتعال انگیز دھاووں کی شدید مذمت کرتے ہوئے دشمن کو اس کے نتائج پر سخت الفاظ میں خبردار کیا ہے۔ قسام بریگیڈ کی طرف سے جاری ایک بیان میں کہا گیا ہے کہ فلسطینی مزاحمتی قوتیں بیت المقدس اور مسجد اقصیٰ کے خلاف ہونے والی اسرائیلی سازشوں، یہودی آباد کاروں اور ان کے انتہا پسند رہنماو?ں کے قبلہ اول پر اشتعال انگیز دھاووں کے سنگین نتائج سامنے آئیں گے اور اس کے نتائج کا ذمے دار اسرائیلی دشمن ہوگا۔ بیان میں خبردار کیا گیا ہے کہ مسجد اقصیٰ کے خلاف یہودی بلوائیوں کے دھاووں اور قبلہ اول میں داخل ہو کر مقدس مقام کی بے حرمتی سرخ لکیر عبور کرنے کی مجرمانہ کوشش ہے جس پر فلسطینی عوام اور مزاحمتی قوتیں خاموش نہیں رہ سکتیں۔ قسام بریگیڈ کے ترجمان نے بیت المقدس کے فلسطینی نمازیوں اور مرابطین کی قبلہ اول کے دفاع کے لیے دی جانے والی قربانیوں پرانہیں خراج تحسین پیش کیا۔ دوسری جانب اسرائیلی فوج نے مقبوضہ مغربی کنارے کے علاقوں میں گھر گھر تلاشی کی مہم کے دوران 6 فلسطینی شہریوں کو حراست میں لے لیا۔ یہ گرفتاریاں غرب اردن کے شمالی شہر جنین میں 2 روز قبل اسرائیلی فوج کے حملے میں 3 فلسطینی شہریوں کی شہادت کے بعد عمل میں لائی گئیں۔ ان فلسطینی شہریوں کو جنین کے نواحی علاقے مرکہ سے گرفتار کیا۔ امور اسیران کلب کے ایک ذمے دار منتصر سمور نے بتایا کہ اسرائیلی فوج نے زاویہ کے مقام پر تلاشی کے دوران 2 فلسطینی نوجوانوں کو حراست میں لے لیا۔ ان کی شناخت احمد علی موسیٰ اور علی محمد موسیٰ کے ناموں سے کی گئی ہے۔


اپنی رائے یہاں لکھیں