شاہ رخ خان کی فلم ’جوان‘ کی تاریخ ساز اوپننگ، پہلے دن دنیا بھر میں ایک ارب 29 کروڑ روپے کی کمائی ’ابھی تو یہ شروعات ہے‘

بالی وڈ کے سپرسٹار شاہ رخ خان کی فلم ’جوان‘ نے ہندی سینیما کی نئی تاریخ رقم کر دی ہے۔ سات ستمبر کو دنیا بھر میں ریلیز ہونے والی اس فلم نے اپنے پہلے ہی دن 100 کروڑ یعنی ایک ارب روپے کی کمائی کا ہندسہ عبور کر لیا۔

پہلے سے ہی فلم جوان کی اوپننگ کے بارے میں قیاس آرائیاں جاری تھیں لیکن کسی نے بھی اس زبردست شروعات کا تصور نہیں کیا تھا کہ یہ فلم عالمی سطح پر اس قدر دیکھی جائے گی اور پہلے دن ہی 100 کروڑ روپے کا بزنس کر لے گی۔یہی نہیں اس نے دوسرے دن بھی 100 کروڑ روپے سے زیادہ کا بزنس کیا ہے اور یہ دونوں اپنے میں علیحدہ علیحدہ اور مجموعی ریکارڈ بھی ہیں۔

دی ہندوستان ٹائمز کی رپورٹ کے مطابق ایٹلی کی ہدایت کاری فلم نے عالمی سطح پر پہلے دن یعنی جمعرات کو ایک ارب 29 کروڑ روپے کا بزنس کیا اور اس طرح شاہ رخ خان کی اداکاری والی فلم نے ایک نئی تاریخ رقم کر دی ہے۔

فلم کریٹک اور باکس آفس پر نظر رکھنے والے مبصر ترن آدرش نے دنیا بھر میں فلم ‘جوان’ کی کمائی کا گوشوارہ پیش کیا ہے۔

شاہ رخ خان کے ہوم پروڈکشن ریڈ چیلیز نے ایکس (ٹوئٹر) پر لوگوں کا شکریہ ادا کرتے ہوئے 129 کروڑ کا پوسٹر لگایا ہے اور لکھا ہے کہ ’ابھی تو یہ شروعات ہے۔‘ خیال رہے کہ یہ اسی جوان فلم کا ڈائیلاگ بھی ہے۔اور اس کے ساتھ اس نے مزید لکھا ہے کہ ’انڈین سینیما کی تاریخ میں یہ سب سے بڑا اوپننگ ڈے (کلیکشن) ہے۔‘

شاہ رخ خان کو ان کے فینز دنیا بھر سے اپنی ویڈیوز اور تھیئٹر سے اپنی تصاویر شیئر کر رہے ہیں جن میں سے بعض کا شاہ رخ خان نے اپنے انداز میں جواب دیا ہے۔

ترن آدرش نے لکھا ‘شاہ رخ خان نے اپنی بالادستی ثابت کردی، جوان نے بین الاقوامی بازار میں دھوم مچا دی۔’ ان کے مطابق اس نے آسٹریلیا میں تقریجا چار لاکھ ڈالر کا بزنس کیا اور نمبر ایک پر رہی۔ اسی طرح نیوزی لینڈ میں بھی یہ نمبر ایک پر تھی جبکہ جرمنی میں نمبر تین پر رہی اور تقریبا ڈیڑ لاکھ یورو کا بزنس کیا۔ برطانیہ میں اس نے دو لاکھ پاؤنڈ سے زیادہ کا بزنس کیا تھا لیکن پوری تفصیل ابھی آنا باقی تھی۔

گذشتہ دنوں جب فلم کا دوسرا ٹریلر آيا تو اس نے دو آتشہ کا کام کیا اور کیا شاہ رخ خان کے مداح اور کیا فلم نقاد سب نے فلم کی تعریفوں کے پُل باندھ دیے۔

یہاں تک کہ شاہ رخ خان کے بظاہر ناقد اور فلم ساز و ہدایت کار وویک رنجن اگنی ہوتری نے اپنے مداحوں سے سوشل میڈیا پر بات چیت کے دوران اس فلم کی تعریف کی اور جب ان سے ایک صارف نے پوچھا کہ کیا آپ وہ فلم دیکھیں گے تو انھوں نے ’ایف ڈی ایف ایس‘ لکھا یعنی وہ پہلے دن پہلا شو دیکھنے کا ارادہ رکھتے ہیں۔

لیکن پھر ’دی کشمیر فائلز‘ کے خالق نے ٹکٹ کی عدم دستیابی کا ذکر کیا تو لوگوں نے انھیں ٹرول کرنا شروع کر دیا۔ فلم کے ٹریلر کے بارے میں انھوں نے ’ادبھوت‘ لفظ کا استعمال کیا جس کا مطلب حیرت انگیز ہوتا ہے۔

بات یہیں ختم نہیں ہوتی۔ ’انڈین ایکسپریس‘ کی رپورٹ کے مطابق شاہ رخ خان نے کہا کہ ہدایتکار راج کمار ہیرانی نے انھیں فلم ’جوان‘ کے ٹریلر کی ریلیز کے بعد سب سے پہلے فون کیا۔ یہ دونوں ایک فلم میں ساتھ کام کر رہے ہیں اور یہ شاہ رخ خان کا اگلا پراجیکٹ ہے