ریاض۔ ۲۱؍ مارچ: سعودی سپریم کورٹ نے شہریوں سے رمضان المبارک کا چاند دیکھنے کی اپیل کی تھی تاہم آج مملکت میں چاند نظر آنے کی شہادت موصول نہیں ہوئی۔
سعودی عرب میں ۲۳مارچ جمعرات کو یکم رمضان المبارک ۱۴۴۴ہجری ہوگا۔ حرمین شریفین (مسجد الحرام اور مسجد نبوی ﷺ) میں کل بعد نماز عشاء تراویح ادا کی جائے گی۔سعودی سپریم کورٹ چاند سے متعلق حتمی فیصلہ دے گی۔
عاجل اور سبق کے مطابق ریاض ریجن میں حوطہ سدیر اور تمیر رصد گاہوں نے اعلان کیا کہ منگل کو چاند نظر نہیں آیا۔
سعودی سپریم کورٹ نے ابھی رمضان کے چاند کے حوالے سے بیان جاری نہیں کیا۔ تمام قانونی کارروائی مکمل کرنے کے بعد رسمی بیان جاری ہوگا۔
یاد رہے کہ سعودی سپریم کورٹ نے مملکت میں موجود تمام مسلمانوں سے اپیل کی تھی کہ وہ منگل 21 مارچ کی شام کو چاند دیکھنے کی کوشش کریں۔ جسے بھی دوربین یا سادہ طریقے سے چاند نظر آجائے تو قریب ترین عدالت میں شہادت قلمبند کرائی جائے۔
علاوہ ازیں متحدہ عرب امارات میں کمیٹی نے اعلان کیا ہے کہ منگل 21 مارچ کو رمضان کا چاند نظر نہیں آیا۔ جمعرات 23 مارچ کو پہلا روزہ ہوگا۔
قبل ازیں فلکی علوم کے ماہر اور مقامی رویت ہلال کمیٹی کے رکن عبد اللہ الخضیری نے کہا تھا منگل کو سورج غروب ہونے سے پہلے ہلال ڈوب جائے گا۔
ان کے مطابق ’ منگل کو بیشتر اسلامی ممالک میں آج چاند دیکھنے کا امکان نہیں تھا‘۔
قطر میں بھی چاند نظر نہیں آیا : آج 30 شعبان
دوحہ: وزارت اوقاف (اوقاف) اور اسلامی امور میں ہلال دیکھنے والی کمیٹی نے اعلان کیا ہے کہ جمعرات 23 مارچ 2023 کو رمضان المبارک کا پہلا دن ہوگا۔
کمیٹی نے مزید کہا کہ ملک میں آج رمضان المبارک کے آغاز کا چاند نظر نہیں آیا۔