ممبئی:7مارچ۔ (ورقِ تازہ نیوز) ہولی کے دن آدھی رات سے ممبئی، پونے سمیت مہاراشٹر بھر میں بجلی کی گرج چمک کے ساتھ تیز بارش ہوئی۔ اچانک آنے والی تیز بارش سے ربیع سیزن کی گندم، چنے، مکئی کی فصلوں کو بڑے پیمانے پر نقصان پہنچا ہے۔ کئی مقامات پر ژالہ باری بھی ہوئی۔ اس لیے کچھ حصوں میں کشمیر جیسا منظر دیکھنے کو ملا۔ اس ژالہ باری سے کسانوں کو بھاری نقصان ہوا ہے اور ربیع کی فصلوں کو نقصان پہنچا ہے۔
ریاست کے ودربھ، مراٹھواڑہ سمیت شمالی مہاراشٹر کے کچھ مقامات پر ژالہ باری ہوئی۔ بیڑ ضلع کے گیورائی تعلقہ کے بنگالی-پمپلا، کاواڈگاؤں، سوشی، وڈگاؤں، چکھلی، کولگاؤں، پڈلسنگی، مدلموہی، دھونڈرائی، اوما پور،اور دیگر کئی گاؤں میں پیر کی شام تیز ہوا اور ژالہ باری کے ساتھ غیر موسمی بارش ہوئی۔
اچانک بارش کیوں ہو گئی؟ گرمی کا پارا چڑھ گیا ہے۔ اس کی وجہ سے بڑے پیمانے پر بخارات بھی بن رہے ہیں۔ اس کے بادل بنتے ہیں اور بارش ہوتی ہے۔ دن میں گرمی اور رات کو سردی محسوس ہونے سے ماحول غیر مستحکم ہوتا جا رہا ہے اور بارش کے بادل بن رہے ہیں۔ تاہم یہ صورت حال عارضی ہے۔