بنگلورو: صدر پردیش کانگریس کرناٹک ڈی کے شیوکمار نے چہارشنبہ کے دن اپنی پارٹی کے منشور میں بجرنگ دَل پر امتناع کی جو بات کہی گئی اس پر تنازعہ پر ردعمل ظاہر کرتے ہوئے سوال کیا کہ بجرنگ بلی اور بجرنگ دل کے درمیان کیا کنکشن ہے۔
انہوں نے کہا کہ وہ خود بھگوان ہنومان کے بھکت ہیں۔ بنگلورو میں کانگریس ہیڈکوارٹرس میں میڈیا سے بات چیت میں شیوکمار نے کہا کہ میں ہندو ہوں اور ہنومان بھکت اور رام بھکت بھی ہوں۔ کیا وہ (بی جے پی قائدین) صرف بھگوان ہنومان کے بھکت ہیں؟۔ امن کی جنت کرناٹک کو ڈسٹرب نہ کیا جائے۔
یہاں ہم آہنگی رہنی چاہئے۔ کانگریس قائد نے کہا کہ بجرنگ دل پر امتناع کی ہماری تجویز سے وہ لوگ گھبرائے ہوئے ہیں۔ منشور میں کوئی تبدیلی نہیں ہوگی۔ کانگریس کے منشور میں ردعمل ظاہر کرتے ہوئے چیف منسٹر کرناٹک بسواراج بومئی نے چہارشنبہ کے دن کہا کہ وہ لوگ (کانگریس والے)کسی بھی قیمت پر بجرنگ دل پر امتناع عائد نہیں کرسکتے کیونکہ یہ حق ریاستی حکومت کو حاصل نہیں ہے۔
انہوں نے کہا کہ بجرنگ دل کُل ہند تنظیم ہے اور ریاستی حکومت اس پر امتناع کیسے عائد کرسکتی ہے؟۔ کانگریس نے امتناع کی بات صرف سماج میں گڑبڑ پیدا کرنے کے لئے کی ہے۔ اسی دوران شیوکمار نے کہا کہ انجنیا (بھگوان ہنومان) اور بجرنگ دل مختلف ہیں۔ بی جے پی کو بجرنگ بلی کا نام لے کر مہم چلانی چاہئے۔