این پی آر کو سپریم کورٹ میں چیلنج۔ عدالت نے حکومت سے مانگا جواب، سی اے اے کے ساتھ ہوگی سماعت

نئی دہلی:قومی آبادی رجسٹر NPR کے پورے عمل کو سپریم کورٹ میں چیلنج کیا گیا ہے۔ عدالت نے اس معاملے میں مرکزی حکومت سے جواب طلب کرلیا ہے۔ عدالت نے کہا ہے کہ اب اس کی سماعت شہریت ترمیمی قانون (سی اے اے) کے ساتھ ہوگی۔ این پی آر کو نریندر مودی حکومت کی کابینہ نے گذشتہ سال دسمبر میں منظور کیا تھا۔ اس میں ، گھر گھر جاکر ایک رجسٹر تیار کیا جائے گا اورجس میں یہ ریکارڈ کیاجائیگا کہ کون ، کہاں رہتاہے

حال ہی میں ، شہریت ترمیمی قانون کو بھی سپریم کورٹ میں چیلنج کیا گیا تھا۔ اس معاملے میں اگلی سماعت اب فروری میں ہوگی۔ اب عدالت ،اس دن این پی آر پر بھی سماعت کرے گی۔ ہم آپ کو بتادیں کہ سپریم کورٹ میں سی اے اے کے خلاف 143 درخواستیں ہیں۔ سپریم کورٹ میں آخری سماعت کے دوران ، حکومت نے کہا کہ اس نے اب تک 60 درخواستوں کے جوابات تیار کیے ہیں۔ حکومت کا مؤقف تھا کہ حکومت کو سی اے اے کی آئینی جواز کو چیلنج کرنے والی درخواستوں کے جوابات کے لئے وقت درکار ہے ، جو اسے ابھی تک موصول نہیں ہوئے ہیں۔اس طرح عدالت نے مرکزی حکومت کو تمام درخواستوں کا جواب دینے کے لئے چار ہفتوں کا وقت دیا ہے۔ پانچویں ہفتے میں اس معاملے کی سماعت ہوگی۔