Waraqu E Taza Online
Nanded Urdu News Portal - ناندیڑ اردو نیوز پورٹل

امریکی صدر ٹرمپ کی مسلم خاتون سیاستدان پر تنقید

واشنگٹن:امریکی صدر ڈونالڈ ٹرمپ نے ڈیموکریٹک پارٹی سے تعلق رکھنے والی مسلم رکن کانگریس الہان عمر کو مذہبی اور لسانی تعصب کا نشانہ بنا ڈالا۔فلوریڈا میں انتخابی ریلی سے خطاب کرتے ہوئے ڈونالڈ ٹرمپ نے امریکی ریاست منی سوٹا سے ڈیموکریٹک پارٹی کی منتخب رکن کانگریس الہان عمر کو نسلی تعصب کا نشانہ بناتے ہوئے کہا کہ صومالیہ سے غیر قانونی طور پر امریکہ آنے والی مہاجر ہمیں سبق پڑھا رہی ہے کہ ملک کو کیسے چلانا ہے۔

ڈونالڈ ٹرمپ نے الہان عمر کی نجی زندگی کو نشانہ بناتے ہوئے کہا کہ خاتون رکن کانگریس نے شادی بھی ایسے شخص سے کی جو رشتے میں ان کا بھائی یا ایسا ہی کچھ لگتا ہے۔امریکی صدر کا کہنا تھا وہ الہان عمر کی وجہ سے منی سوٹا سے الیکشن جیت جائیں گے کیونکہ کانگریس رہنما ہمارے ملک سے محبت نہیں کرتیں۔خیال رہے کہ الہان عمر 12 برس کی عمر میں صومالیہ سے امریکہ منتقل ہوئی تھیں اور 5 سال بعد یعنی 17 برس کی عمر میں انہیں امریکی شہریت مل گئی تھی۔الہان عمر 2018 میں منی سوٹا سے ڈیموکریٹک پارٹی کے ٹکٹ پر کانگریس کی رکن منتخب ہوئیں اور ان پر امریکی شہریت کےلئے بھائی سے دوسری شادی کا الزام عائد کیا جاتا ہے تاہم وہ خود پر لگنے والے الزامات کی سختی سے تردید کرتی رہی ہیں۔